Angut 42-nik ukiulik Blok 5-imi toqutsisimasutut unnerluutigineqartoq aamma nakuusersimasutut unnerluutigineqarpoq. Tamanna unnerluussutit naapertorlugit pisoq qaammatit marlussuit sioqqullugu pisimasutut oqaatigineqarpoq.
Ilisimannittoq Danmarkimiit sukumiinerusumik oqaluttuarluni videokkut apersorneqartoq Sermersuup Eqqartuussiviani marlunngornermi ullaap tungaa tusarnaarpaat. Ingerlalluarpallaanngilaq.
Angut 42-nik ukiulik Blok 5-imi toqutsisimasutut unnerluutigineqartoq aamma nakuusersimasutut unnerluutigineqarpoq. Tamanna unnerluussutit naapertorlugit pisoq qaammatit marlussuit sioqqullugu pisimasutut oqaatigineqarpoq.
Ilisimannittoq Danmarkimiit sukumiinerusumik oqaluttuarluni videokkut apersorneqartoq Sermersuup Eqqartuussiviani marlunngornermi ullaap tungaa tusarnaarpaat. Ingerlalluarpallaanngilaq.
- Suna pineqarnersorluunniit naluara, arnaq oqarpoq.
Arnap angut arlaleriarluni niaqqumigut nakuusersimasutut politiinut unnerluutigisimavaa. Tamanna Nuussuarmi 2024-mi pisimasutut oqaatigineqarpoq.
Paatsiveerusimaarpasipporli taamanilu pisut eqqaamasinnaarpasinngilai.
Unnerluussisup ilisimannittoq eqqartuussinermi ilaajunnaarsippaa. Taassuma nakuuserfigineqarsimasutut unnerluussutini aamma tunuartissaneraa kingorna paasinarsissaaq.
Angut 42-nik ukiulik Blok 5-imi toqutsisimasutut arnamullu nakuusersimasutut pisuunnginnerarpoq.
Simerneq angisooq aappaluttoq
Blok 5-imi inissianik suliaqartumit saniliniillu marlunnit Blok 6-imeersunit ullaap tungaani tusagaqarpugut.
Inissianik suliaqartoq pasinarsinnaasumnik takusaqarsimanngilaq. Sanililli madrasit eqqaavissualiaassassatut iginneqarsimasut takusimallugu oqaluttuarput.
- Madrasimi ataatsimi angisuumik, aappaluttumik simerneqarpoq, ataaseq oqaluttuarpoq.
Ilisimannittup annertuumik aattaqartoq aallaqqaammut naluaa. Viinni aappaluttuusinnaasoq allaasinnaasorluunniit eqqarsaannarsimavoq, taanna oqaluttuarpoq.
Nassuiaatit taakku tamarmik qangarpiaq toqutsisoqarsimaneranik paasinninnissamut iluaqutaassagunarput.
