Arnaq tigusarineqartoq: Mittarfimmi qaartitsisoqarnissamik sioorasaarisoqartoq

Kalaallit Nunaanni politiit Nuummi mittarfimmi qaartitsisoqarnissaanik siorasaarisoqarsimasoq nalunaarfigineqarput.

Nalunaarut marlunngornermi ualikkut nal. 15.32 tiguneqarpoq.

Taamaattumik Nuup mittarfia terminalilu inuerunneqarput, politiillu misissuillutik.

- Arnaq tigusarineqarnikuuvoq, pasineqarporlu Nuup mittarfiani qaartitsinissamik siorasaarisimasutut. Tigusarineqartup tigummigallagaanissaa pillugu eqqartuussisuserisut naliliissapput, Kalaallit Nunaanni politiini pigaarutt pisortaat Aqqalu Petersen Sermitsiamut oqarpoq.

Inatsisitigut kinguneqartuartoq

Taassuma aamma oqaatigaa, qaartitsinissaq pillugu siorasaarisoqartillugu imaluunniit mittarfimmiinnermi qaartartunik eqqartuinissaq inatsisitigut unioqqutitsinerusoq.

- Qaartitsinissamik siorasaaruteqartoqarneranik nalunaarummik tigusaqarnermi suleriuserput ataasiinnaavoq. Tassa taama iliortup tigusarinissaa, tamatumalu kingorna inatsisitigut eqqartuussivitsigullu kinguneqartitsinissaq. Kingunerisarpaa minnerpaamik akiligassitsinneqarneq, Aqqalu Petersen oqarpoq.

Pigaartut pisortaa ilisimatitsivoq tamanna nunatsinni mittarfinni tamani atuuttoq.