Arnat spiralilerneqarsimasut sisamat siulliit taarsiiffigineqartut

Arnat sisamat siulliit spiralilersuisimaneq pillugu suliamut atatillugu Danmarkimit taarsiiffigineqarput. Arnat tamarmik immikkut 300.000 koruuninik taarsiiffigineqarput.

Napparsimasunut taarsiissuteqartitsivik, taarsiiffigitinnissamik qinnuteqaatinik suliarinnittartoq, taama paasissutissiivoq.

Taarsiissutissat Folketingimi qanittukkut akuerineqaqqammerput, 1. septembarimilu pisortatigoortumik atuutilersinneqarlutik, arnalli juulip aallaqqaataaniilli taarsiiffigitinnissamut qinnuteqarsinnaapput, taamaammallu Napparsimasunut taarsiissuteqartitsivik sulianik siullernik maanna aalajangiisinnaalereerpoq.

- Arnat siulliit maannakkut taarsiiffigisinnaagatsigit nuannaarutigaarput.

- Taakku matumani pineqarput. Arnat kannguttaatsuliorfigineqarnermik kingorna ukiorpassuarni anniaateqarput, arnallu ataasiakkaat naggasiinermi ikiorsinnaallugit neriuutigaarput, Karen-Inger Bast, napparsimasunut taarsiissuteqartitsivimmi pisortaq tusagassiutitigut nalunaarummi oqarpoq.

Napparsimasut taarsiiffigitinnissaannut tunngatillugu suliap suliarineqarnera qaammatit pingasut missaat ingerlasassangatinneqarpoq. Suliamiilli suliamut nikerarsinnaavoq. Tallimanngornermi ullaagaa arnat katillguit 353-it taarsiiffigineqarnissaminnut qinnuteqarsimasut ilisimatitsissutigineqarpoq.

Napparsimasunut taarsiissuteqartitsivik sapaatip-akunnerata tullianiit taarsiiffigineqarnissamut aaqqiissut pillugu Odensemi, Aalborgimi, Aarhusimi Københavnimilu kalaallit illuini paasissutissiissaaq.

Tamatuma saniatigut Napparsimasunut taarsiissuteqartitsivik arnat najugaqarfiini naapinniarlugit, aaqqissuussaq pillugu paasissutissiiumalluni siunnersuiniarlunilu Kalaallit Nunaanni oktobarimi angalassaaq.