Arnat spiralilersuisimanermik suliami pineqartut ilaat suli arlalinnik apeqqutissaqartoq

Tallimanngornermi nalunaaqutaq ataatsimut Naalakkersuisut spiralilersuisimanermut suliamut atatillugu inuit pisinnaatitaaffii pillugit nalunaarusiat marluk pillugit tusagassiortunik katersortitsinerat malinnaaffiginiarlugu inuppassuit isiginnaarutip qarasaasialluunniit saavaniipput.

Taakkua ilagaat Uullat Bach, arnat ukiorpassuit matuma siorna akuersinatik spiralilerneqarsimasut ilaat.

Taannalu tusagassiortunik katersortitsinerup kingorna paatsiveerusimaarpoq.

- Ajornartorsiutit sulialluunniit marluk assigiinngitsuusut isumaqartuaannarnikuuvunga. Aappaa inuttut pissutsinut tunngasoq. Aappaalu politikkimut tunngasoq. Taamaammat taakkua immikkoortissinnaalluarpakka.

- Aammali saqqummiussaminnik itisiliinerusinnaannginnersut eqqarsarpunga. Sooq sammisat sisamat taakku toqqarpaat? Sooq taamatut aalajangerpat? Tamanna paasissallugu iluarsimassagaluarpoq, taanna oqarpoq.

Meeqqanut, inuusuttunut, inatsisinik atuutsitsinermut naligiissitaanermullu naalakkersuisup Marianne Paviasen Jensenip (IA) tusagassiortunik katersortitsinermi nalunaarusiani allassimasut itisiliiffiginngilai, Naalakkersuisulli siulittaasuata Jens-Frederik Nielsenip (D) Naalakkersuisut maanna suliniutiginiagaat sisamat naatsumik saqqummiuppai.

AAMMA ATUARUK

Immikkut ilisimasallit nalunaarutaat: Akuersissuteqarani spiralinik ikkussuineq inuit pisinnaatitaaffiinik unioqqutitsineruvoq

Spiralini marniliuuttoq napparsimmavimmut unitsitaasoq

Uullat Bach ullut ilaanni qatanngutisiaminit sianerfigineqarpoq, taassuma arnat akuersinatik spiralilersorneqarsimasut suleqatigiittut tusarsimavaa. Anniarujussuartarsimannginnersoq aperaa. Aap, kisianni nakatsukkut quullu aqqutaatigut aseruuttoornera pissutaasimapput, taanna oqarpoq. Qaammatialuilli qaangiummata eqqaaqqeriasaarpaa.

Spiralini marniliuussimammat napparsimmavimmi uninngasimavoq. Eqqaasani tupaallaatigalugu Aasianni peroriartorfigisimasamini spiralilerneqarsimanini pillugu peqqissutsimut paasissutissat pissarsiariniarlugit allakkanik takunnissinnaanermut akuerineqarnissamut Aasianni napparsimmavimmut qinnuteqarpoq.

- Atuapallappakka. Ilumoorpa? Ilumoorpa? Aap, 15-inik ukioqarlunga napparsimmavimmut unitsinneqarpunga. Spiralilerneqarpunga. Takorluugaannaanngitsoq imminut qularunnaarsinniaannarlunga. Piviusuuvoq, ilumoorpoq. Taava mappimut ikiinnarpakka. Atuaqqinngisaannarlugillu.

Uullat Bach arnat allat piumasarinngisaminnik spiralilerneqarsimasut assigalugit naartulernissamut ajornakusoortitsivoq. Napparsimmavimmi misissorneqarami mannissaqarfiata aappaa qilerunitsitersimalluni matulluinnarsimasoq oqarfigineqarpoq.

Kisiannili naartulerlunilu pilatsilluni erninermigut ernertaarpoq. Kingusinnerusukkut arlaleriarluni naartulertaraluarpoq, illissamili avataatigut naartulertarpoq. Qilerunitsitersimavallaarmat illiaarsippoq.

Uullat Bachip ukiorpassuit tamatuma kingorna peqqissutsimut paasissutissat imminut tunngasut piviusulersaarusiortoqarneranut atatillugu misissorpai.

- Peqqissutsimut paasissutissat uannut tunngasut misissoqqaarakkit killitseqaanga. Qanoq pisoqarsimaneranit nakorsallu allaganit paasisakka ajussutigaakka. Qanoq pisoqarsimanera qanorlu pineqarsimanera paasigakku aliasungaarpunga, taanna oqarpoq.

Nalunaarusiami inuiannik nungusaasoqannginneraasoqartoq

Uullat Bachip spiralilersuisimaneq pillugu nalunaarusiat atuassallugit suli periarfissaqarsimanngilaq, nalunaarusiamili ataatsimi inuiannik nungusaasoqarsimanera ilumuunnginnerarneqartoq tusagassiuutitigut paasisimavaa.

AAMMA ATUARUK

Siumut Nalerarlu spiralilersuisimaneq pillugu nalunaarusiat pillugit nalunaaruteqartut: Danmark akisussaatinneqartariaqarpoq

Taamatut isummerneq paasisinnaavaa, oqaasermi atorneqartoq isumaqaqaaq. Maanna qanoq pisoqassanersoq suli apeqqutigaa, tusagassiortunillu katersortitsinermi Naalakkersuisunit pitsaanerusumik akineqarsimanissaa kissaatigigaluarpaa.

- Naleraq Siumullu eqqartuussivimmut Haagimiittumut suliassanngortitsippata qanoq pisoqassava? Tassanngaanniit taava qanoq pisoqassava? Maanna akunnattooqqaffimmiippugut.

- Tamanna artornartorujussuullunilu nuanneeqisoq isumaqarpunga, Uullat Bach oqarpoq.

Naalakkersuisut uku sisamat sulissutiginiarlugit tusagassiortunik katersortitsinermi oqaatigaat:

1. Folketingip taarsiissuteqarnissamik aalajangernera ministeriunerullu utoqqatsernerat tusaaneqassapput. 

2. Nunatsinni ikip mamisarneqarnissaa aallartinneqassaaq, aamma naalagaaffiup tamanna akisussaaffigissavaa. 

3. Danmarki peqatigalugu saammaasseqatigiinnermut ataatsimiititaliarsuaq pilersinneqassaaq, piviusoq qulaajarneqassaaq saammasseqatigiittoqassallunilu.  

4. Piumasarineqassaaq naalagaaffik inatsisitigut ataataqanngitsunut, akuersisoqarsimatinnagu qitornavissiartaartitsisarnerillu aamma misissorneqarlutillu iliuuseqarfigineqassasut.