Ataatsimiititaliami siulittaasoq isumalluartoq: USA-mik ataatsimeeqateqarneq oqaloqatigiilluartoqarnerulernissaanik aallartitsissaaq
Kalaallit Nunaata, Danmarkip USA-llu pingasunngorpat ataatsimiinnerat USA-mik oqaloqateqarnerulernissamut aallarniutaassasoq neriuutigaara, Nunanut Allanut Sillimaniarnermullu Ataatsimiititaliami siulittaasoq oqarpoq. Folketingimi Nunanut Allanut Ataatsimiititaliarlu ataatsikkut marlunngornermi ullaakkut ilisimatinneqarnertik aamma nuannaarutigaa.
Assi: Jensine Berthelsen
Folketingimi nunanut allanut tunngasunut ataatsimiititaliaq Kunngeqarfiup USA-mut attaveqarnera pillugu paasissutissinneqarnissaanut marlunngornermi qaaqquneqarpoq, tamatumuunalu Inatsisartuni nunanut allanut sillimaniarnermullu ataatsimiititaliami kalaallit ilaasortat aamma paasitinneqarput.
Ataatsimiititaliaq tusagassiuutinut nalunaarummi taama ilisimatitsivoq.
Ataatsimiititaliami siulittaasup Pipaluk Lyngep (IA) killileereernermi kinguneranik taamaattoqartalernerarlugu Sermitsiamut itisilerpaa.
- Siullerpaamik ataatsikkut paasissutissinneqarpugut. Aatsaat kingusinnerusukkut tusagassiuutitigut saqqummiunneqareeraangatta paasissutissinneqartaraluarpugut.
- Killiliinerma kingorna taamatut pisoqarpoq, Pipaluk Lynge oqarpoq.
Ataatsimiititaliap siulittaasuata Inatsisartut ataatsimiititaliaat Folketingimi ataatsimiititaliarlu ataatsikkut ilisimatinneqannginnerat pissutigalugu danskit politikerii Inatsisartunik suleqateqarnermi ’nunasiaatilittut periaaseqarnerarlugit’ sapaatip-akunnerani kingullermi sakkortuumik isornartorsiorpai. Isornartorsiuinerlu qallunaat tungaanniit qisuariarfigineqarluni.
Isumalluartoq
USA-p præsidentiata tullia J.D. Vance Washingtonimi Kalaallit Nunaata, Danmarkip USA-llu akornanni ataatsimiinnermi qaaqqusisuujumaartoq, Nunanut allanut ministeri Lars Løkke Rasmussen nunanut allanut tunngasunut ataatsimiititaliami ataatsimiinnerup kingorna tusagassiuutinut arlalinnut oqarpoq.
Pipaluk Lynge maannakkut isumalluarluni oqarpoq:
- Oqarsinnaavunga nunat pingasut taakku kiisami oqaloqatigiilertut, neriuinnarpungalu oqaloqatigiittarnissat amerlasuut siullersarissagaat.
- Nunanut allanut tunngasunut naalakkersuisutta ataatsimeeqatiginiarmassuk aaqqissuussaanitsinnik toqqaannarlu oqaloqatigisinnaanerannik akuerinninnerannik aamma takussutissiivoq.
Folketingimi ataatsimiinnerup kingorna nutaarsiassaq alla saqqummiunneqarpoq, tassa naalakkersuisup Vivian Motzfeldtip (S) illersornissamullu ministerip Troels Lund Poulsenip Nato-p generalsekretæria Mark Rutte ataasinngorpat ataatsimeeqatigissagaat.
Taanna pillugu Pipaluk Lynge ima oqarpoq:
- Nuannaarutigaara sulineq ingerlammat, suliallu arlallit aallartinneqarlutik. Oqareernittuut isumalluarpunga, neriuutigalugulu Nato-mi iligiit pisumi matumani peqataanerulissasut.
