Ataatsimiititaliap Naalakkersuisut akerlilerai: Danmarkip mittarfinnut piginneqataassutai tiguneqariartuaarneqassapput
Aningaasaqarnermut Akileraartarnermullu Ataatsimiititaliami ilaasortat isumaqatigiittut Naalakkersuisut Naalagaaffiup oqartussaasuinut Greenland Airports International A/S-ip tamakkiisumik pigilernissaa siunertaralugu saaffiginnissasut innersuussutigaat.
Greenland Airports Internationalip Nuummi mittarfik nutaaq sanatippaa, pigaa ingerlataralugulu. Ilulissani mittarfissaq ukiaru ammartussaq aamma akisussaaffigaa.
Toqqorsivimmit: Oscar Scott Carl
Naalakkersuisut Greenland Airports Internationalimi danskit naalagaaffiata piginneqataanerata pisiarinissaa maannakkut aningaasaqarnikkut imminut akilersinnaanngitsoq mianersoqqussutigaat.
Naalagaaffiup piginneqataassutai 33 procentiusut pisiarineqarpata, aktiat nalingat aamma pisinerup qanoq aningaasalersorneqarnissaa isumaqatigiinniutigineqartariaqarlunilu nalilersorneqaqqaartussaapput. Nunap karsianiit aningaasartuutaangaatsiarsinnaasoq Naalakkersuisuit ukiaq naliliiffigaat:
- Nunatta karsiani pissutsit imaapput, amerlanerusunik
aningaasaliinerit pingaarnersioqqissaarneqartariaqarput aamma
maannakkorpiaq pisariaqartut tatisisut sammineqarnissamik
nukissanillu pisariaqartitsisut atuupput, Naalakkersuisut Pele Brobergip siunnersuutaanut akissuteqaamminni mianersoqqusipput.
Aningaasaqarnermut Akileraartarnermullu Ataatsimiititaliami ilaasortat isumaqatigiittut danskit naalagaaffiata mittarfeqarfinnut piginneqataassutai tigunissaat siunertaralugu Inatsisartut Naalakkersuisunut suliami iliuuseqaqqullugit siunnersuutigaa. Naalagaaffiullu oqartussaasuinut kingusinnerpaamik 2027-mi januaarip aallaqqaataani saaffiginnittoqaqqusilluni.
Naalagaaffik mittarfiliortiternermut milliardilinnik aningaasaliivoq
Siunnersuut Inatsisartut ullumi ataatsimiinneranni oqaluuserineqartussami oqaaseqaammi atuarneqarsinnaavoq.
Naalakkersuisut danskit naalagaaffiannik suleqateqarnertik pissutigalugu Kalaallit Nunaata attaveqaatai pioreersut allilernissaannut periarfissaqalersimanera qulakkeerneqarsimasoq siusinnerusukkut akissuteqaamminni tunngavilersuutiginikuuaat. Tamannalu piffissaq ungasinnerusoq eqqarsaatigalugu innuttaasunut inuussutissarsiortunullu iluaqutaassasoq.
Aamma Naalakkersuisut Greenland Airports Internationalimi 67 procentimik piginneqataanermikkut aalajangiisuulluinnarnerat, kiisalu Kalaallit Nunaata piffissaq ungasinnerusoq eqqarsaatigalugu ingerlatseqatigiiffik tamakkiisumik pigilissagaa aamma isumaqatigineqarluni.
Folketingimi aningaasaqarnermut ataatsimiititaliap sanaartornermut tapiissutinik 400 millionit koruuninik aamma Greenland Airports Internationalimut taarsigassarsinissamut nutaamik 1140 millionit koruunit angullugit aningaasaliissuteqarnissaq akuerisimagaa 2025-mi aasakkut saqqummiunneqarpoq. Aningaasat taakku Ilulissani mittarfiliornerup naammassinissaanut atorneqartussaapput.
Aningaasaliissutit taakku saniatigut naalagaaffik 700 millionit koruuninik aningaasaliivoq, aamma 1 milliardit koruuninik taarsigassarsisitsisoqarnikuulluni. Aningaasat Nuummi Ilulissanilu mittarfiliornermut atorneqarput.
