AAQQISSUISUUNEQ USA-MIK ATAATSIMEEQATEQARNEQ PILLUGU
- Ataatsimiittoqaqqissappat iluatsissimassaaq
Vivian Motzfeldtip Lars Løkke Rasmussenillu amerikamiunik ataatsimeeqateqarnerat pitsaanerpaamik angusaqarfiussappat, aqqutit eqqortut atorlugu oqaloqatigiittarnissamut aallarniutaassasoq aaqqissuisuunerup nalilerpaa. Ajornerpaamillu pisoqassappat ajornartooqqaneq nalornisitsisoq Kalaallillu Nunaata tatineqangaarnera maanna pisoq ingerlaannassaaq.
Masaana Egede, Sermitsiaq
Assi: Oscar Scott Carl
Sermitsiami aaqqissuisuunerup pisortaanerullu Masaana Egedep amerikamiut Kalaallit Nunaannut tatisinerat soorunami qanimut malinnaaffigaa.
Kalaallit Nunaata, USA-p Danmarkillu Washingtonimi ullumi ataatsimiinneranni Kalaallit Nunaannut iluaqutaasumik kinguneqarsinnaaneranik ilimasunneq annertussanngitsoq taassuma nalilerpaa.
Pisinnaasut marluk ilimagai:
- Ataatsimiinnerup ataatsimeeqatigeeqqinnissamik kinguneqarnissaa ajugaanerussaaq. Tassami attaveqatigiinneq taamaaliornikkut nalinginnaanerulissammat, oqaloqatigiinnerlu nangeqqissalluni, Masaana Egede oqarpoq, nangipporlu:
- Taamaattumik ataatsimiittoqaqqinnissaa isumaqatigiissutigineqassappat, naak ataatsimiinnerni aalajangersimasunik angusaqartoqanngikkaluartoq, tamanna ajugaanertut isigineqassaaq — pissutsit maanna atuuttut eqqarsaatigalugit ajugaasoqarsinnaassappat.
- Kalaallit Nunaata Nunat tamalaat isumaqatigiissutaat, inatsisit malittarisassallu illersuutissatuarai
Ataatsimiinnermi ingerlanerliorpat?
- Oqarsinnaavunga pisussat ajornerpaartaat tassaasoq oqaloqatigiittoqannginnissaa. USA-p maannakkut iliornini attatiinnassappagu, diplomatiikkullu nalinginnaasumik attaveqatigiinnissat avaqqullugit oqallinneq ingerlatiinnassappagu. Taamaalilluni Kalaallit Nunaannut tatisineq attatiinnarneqarluni, Masaana Egede oqarpoq.
Masaana Egedep tamatumunnga atatillugu Kalaallit Nunaata illersorneqarnissaa nunat tamalaat akornanni inatsisitigut pisoq erseqqissarpaa:
- Kalaallit Nunaata nunat tamalaat isumaqatigiissutaat, inatsisaat malittarisassallu illersuutissatuarai. Aamma nunaavugut tamat oqartussaaqataanerannik tunngaveqarlunilu aaqqissuussaasoq.
Illuatungerisap nunap pissaanilissuunera unammilligassaasoq annertooq naqissuserpaa. Nuna Danmarkimiit Kalaallit Nunaanniillu pissaaneqarnerusoq maannamullu oqaloqatigiinnissamut soqutiginninnermik takutitsinngitsoq.
- Isummaminnik allanngortitserusunngillat
Naalakkersuisut siulittaasuata Jens-Frederik Nielsenip ministeriunerlu Mette Frederiksenip marlunngornermi tusagassiortunik katersortitsinermi Kunngeqarfiup inissisimaffia paatsoorneqarsinnaanngitsumik oqariartuutiginerat ataatsimiinnermi pingaaruteqarluinnartoq aaqqissuisuuneq isumaqarpoq.
Jens-Frederik Nielsenip Kalaallit Nunaata USA-mut ilaannginnissani kissaatiginngilluinnaraa tusagassiortunik katersortitsinermi naqissuserpaa.
- USA-mut ilanngukkusunnginnerput pillugu isummaminnik allannguerusunngillat. Erseqqissumilli oqariartuuteqartarnerat nersugassaavoq, Masaana Egede oqarpoq, taassumalu aamma illuatungiliuttut oqaaseqarluartinneqartarsimanerat aamma nalilerpaa:
- Naalakkersuisooqatigiit piffissami nutaajunerpaami aatsaat taama simmasitsigaat, illuatungiliuttut partii ataasiinnaavoq. Illuatungiliuttut soqutigisaat, namminiilivinnissamut avissaarnissamullu tunngasut tusagassiuutitigut sammineqangaatsiarput. Massakkut pisuni naalakkersuisut USA-mut tunngatillugu angorusunngisaat, naliliivoq.
Folketingimut qinersinerup kingorna susoqassava?
Ministeriuneq Mette Frederiksen naalakkersuinermini Kalaallit Nunaata nammineerluni aqqutissaminik nassaarnissaanik, soorluttaaq USA-mit tatineqaraluarluni Kalaallit Nunaata nammineersinnaanera aalajangiusimalluinnaraa Masaana Egedep eqqaavaa.
- Siornatigut ministeriusimasut nalaanni immaqa taamatut ikiorneqarneq ammaffigineqarnerlu misiginikuugunanngilarput, oqarpoq, Danmarkimilu pissutsit qanittukkut allanngorluinnarsinnaanerat tikkuarlugu:
- Aarlerinaateqarsinnaavoq, Danmarkimimi ukioq manna folketingimut qinersisoqassaaq, ammaffigineqarnerpullu tigulluanngikkutsigu folketingimut qinersinerup kingorna taamaattoqaannarsnnaanera qularnarpoq.
