Atlantikup avannaanit ilaasortaatitat marloriaammik aningaasarsiaqarsinnaanerat partiit peerniaraat

Folketingimi ilaasortaq Kalaallit Nunaata Savalimmiulluunniit Inatsisartuinik atuuffimminik ingerlatsiniarluni akissarsiaqarluni sulinngiffeqarsinnaassanngilaq, taamaalillunilu marloriaammik aningaasarsiaqarluni.

Taama Danmarksdemokraatit Karina Adsbølilu, partiip Folketingip Præsidianut ilaasortaatitaa isumaqarpoq, taamaammallu folketingimut qinersisarneq pillugu inatsisip allanngortinnissaa siunertaralugu aalajangiiffigisassatut siunnersuummik saqqummiussilersaarpoq.

- Atuuffik atunngikkaanni inatsisartunilu allani suligaanni marlunnik aningaasarsiaqarnissaq naapertuilluanngitsuusutut isigaarput.

- Tamanna akileraartartut aningaasaataannik atuilluarnerunngilaq, Karina Adsbøl oqarpoq.

Danmarksdemokraatit SF-mit taperserneqarput.

- Danskit malittarisassaat Savalimmiut kalaallillu malittarisassaannut tulluarsartariaqarput, taamaalilluni marluinnik aningaasarsiaqartoqarsinnaajunnaarsillugu, Karsten Hønge, SF-p Præsidiami ilaasortaatitaa oqarpoq.

Karina Adsbøl qanittumi Statsiministerimit arlalinnik akissutisivoq, akissutinilu Savalimmiut Kalaallillu Nunaata malittarisassai nassuiarneqarput.

Savalimmiuni inatsit allanngortinneqaliivippoq, taamaalilluni tullianik lagtingimut qinersinermit Folketingimi issianermi Lagtingimit sulinngiffeqarnermi aningaasarsisoqarsinnaajunnaassalluni, Lagtingi allappoq.

Kalaallit NUnaanni Danmarkimisulli Savalimmiunisulli Folketingimi ilaasortaaneq isumagissallugu Inatsisartunit sulinngiffeqartoqarsinnaavoq. Sulinngiffeqarnermilu ajunngitsorsiaqartoqarneq ajorpoq - tassa aningaasarsisoqarneq ajorpoq.

Ukiumut 1,5 milliuunit

Danmarkimili taamaattoqanngilaq, tassani Folketingimut ilaasortaq malittarisassat malillugit tamakkiisumik aningaasarsiaqarluni sulinngiffeqarnissamik qinnuteqarsinnaavoq, tamanna assersuutigalugu Inatsisartuni ilasortatut ataatsimiinnerni peqataanissamik tunngavilerneqarluni.

Aki-Matilda Høegh-Dam Naleqqameersoq taamaaliorpoq.

Taanna septembarimi Inatsisartut ukiaanerani ataatsimiinnissaani peqataaniarluni Folketingimit aningaasarsialerluni sulinngiffeqartinneqarpoq, taamaalilluni aamma marsimi Inatsisartunut qinersinerup kingorna aningaasarsiaqarpoq.

Tamanna marloriaammik qaammammut 125.000 kr-nik, ukiumut 1,5 milliuunit missaanik naleqartumik aningaasarsisartoq, Ekstra Bladetip siusinnerusukkut nassuiarpaa.

Peqatigisaanik Folketingimi sinniisussaa Elvira Kûitse, aamma Aki-Matilda Høegh-Damip tamakkiisumik aningaasarsiaqarluni sulinngiffeqarnerani aamma aningaasarsiaqarpoq.

/ritzau/