Atsiornerit kuultit?

Tamatta naalagaaffiit oqaloqatigiinnerat sivisuumik isiginnaarparput, tassani Kalaallit Nunaata Danmarkillu Trump politikkikkut naapertuilluanngitsumik pinnguaqqittoq inissittariaqarnikuuaat.

Naalakkersuisunut atorfilittaannullu, danskit naalakkersuisuinut taakkualu aallartitaannut nersualaarinnittorpassuarnut ilaavunga. Amerikamiut aaqqissuussaanerat maannakkut tarnikkut napparsimasutut pissuseqartoq nalinganik pissallugu suliassarujussuaq imaannaanngitsoq naammassisariaqarsimavaat.

Isumaqatigiissutip 95 procentia takugaanni isumaqatigiissut isumaqatigiissummut pioreersumut taama assingutigippat sooq taama uivertoqartiginersoq, aperisoqarsinnaavoq. Sooq atsiornerit 1951-imeersut atuukkunnaassanersut imminut apererusuppunga.

Atsiornerit siulliit killissaqarsimappata, taava atsiornerit nutaat qanoq sivisutigisumik atuutissappat? qaqugu atorunnaassanersut tunngaviusumik isumaqatigiissuteqartoqanngilaq, præsidentilli tulliata isumaqatigiissut nutaaq nutaamik pitsaanerusumillu taarserniarlugu atorunnaarsissagaa neriuutigisinnaavarput.

Isumaqatigiissummi isumaqatigiissutip imarisai pillugit isumaqatigiinngittoqalissagaluarpat qanoq iliortoqassanersoq pillugu pilersaarusiortoqarsimasoq aamma takusinnaanngilara. Akerleriissut tamanna sumi aaqqinneqassava? Nalinginnaasumik eqqartuussivik inatsisitigut isumaqatigiinngissuteqarnermut akuliuttarpoq, Trumpili eqqartuussivinnik atuinissamut pikkorinnerpaananilu nunani tamalaani eqqartuussiviit atortuusut akuerinngilai.

Isumaqatigiissut ajunngitsunik imaqarpa? Aap, peqarpoq. Kalaallit Nunaat namminersulissappat/namminiilissagaluarpat NATO-mut ilaasortanngornissamik piumasaqaat ajunngitsoq uanga nammineq isumaqarpunga. Naalgaaffissuarmit ajortumik pineqartilluta Kalaallit Nunaat nalorninartumik inissisimasoq suliap tamarmi ersarissumik takutippaa. Pissutsini taama ittuni NATO-mut ilaasortaaneq toqqissisimalersitsisinnaavoq. Maanna USA NATO-mut ilaasortaavoq, nunalli NATO-mi ilasaortaasut allat Kalaallit Nunaata tiguarneqarnera NATO-p isumaqatigiissutaanik unioqqutitsinerussasoq erseqqissumik oqaatigaat. Tamannalu Kalaallit Nunaata nuannaarutigissavaa.

Isumaqatigiissutip avissaartuunneq Kalaallit Nunaanni atuuttoq unitsinngilaa. Periarfissarsiortunik, namminneq iluaqutissaminnik politikkikkulluunniit anguniagaminnik siuarsaaniarlutik pissutsinik taamaattunik atornerluisartunik peqartoq pisimasut tamarmik takutippaat. Taamatut pisoqartuaannassaaq, tamannalu eqqumaffigisariaqarparput.

USA-p Kalaallit Nunaannik aqutsinerulerusunnera maanna unitsinneqanngilaq. Allaat isumaqatigiissut nutaaq atsiorneqaraluarpalluunniit. Maanna pissutsit allanngorput, Amerikamiullu sunniiniarnerat sunniuteqarnerujartuinnassaaq. Allatut pisoqarumaarpoq, kisianni pisussaavoq.

Tamanna pillugu ingammik nunatsinni inuussutissarsiortut eqqumasariaqarput. Suliffeqarfinnit Anori A/S-imit, avataaneersunit pisinissamut neqeroorfigineqartorujussuarmit, tamanna nalunngilara. Suliffeqarfinnik pisisoqassaaq, peqquserluttuliortoqassaaq allarpassuarnillu peqqusersusaarisoqassaaq. Tamatumuuna politikkikkut aaqqissuussaaneq aammattaarli kalaallit inuiaqatigiit innuttaasullu misilinneqartussaapput. Kinami kuultimik atsiorusunngila?