ILINNIARNEQ
Attaveqatigiit nutaat inuusuttut piginnaanngorsarnissaannik peqataatinnissaannillu ukkatarinnittut
Inuusuttut amerlavallaartut suliffeqaratillu ilinniagaqanngillat. Attaveqatigiit nutaat inuusuttunut suliniuterpassuarnit aallarnisaanerpassuarnillu misilittakkat tunngavigalugit ineriartortinneqarput.
Attaveqatigiit nutaat meeqqat atuarfianniit ilinniagaqalernermut suliffittaarnissamulluunniit ikaarsaariarnermi, attassiinnarnissamik siunnersuinermillu sammissaqarput. Attaveqatigiit inuiaqatigiit ikitsut immikut nalimmassakkanik "nunaqarfimmiunut naleqquttunik", tassa najukkani atukkanut naleqqussakkanik, aaqqivigineqarnissaat aamma ukkataraat.
Assi: AQQUT
Nunani avannarlerni inuusuttut suliffeqanngitsut ilinniagaqanngitsullu Kalaallit Nunaanni amerlanerpaapput.
Inuusuttut 16-it 25-llu akornanni ukiullit 30 procentii missaat 2021-mi ilinniagaqaratillu suliffeqanngillat. Aamma 25-t 64-illu akornanni ukiullit affaannit amerlanerusut meeqqat atuarfiannit allamik ilinniagaqarsimanngillat.
Nunani Avannarlerni Inuuneq Naallugu Ilinniarnermik Attaveqaat tassaavoq Nunani Avannarlerni Ministerit Siunnersuisoqatigiivisa ataanni nunat avannarliit tallimat, Danmarkip, Finlandip, Islandip, Norgep Sverigellu namminersorlutillu oqartussaaffillit pingasut, Ålandip, Savalimmiut Kalaallit Nunaatalu, ataatsimoorullugu suleqatigiiffiat.
Misilittakkanik avitseqatigiinneq
AQQUT
Kalaallit Nunaanni aqqutissiuussisoqarfik
Ilinniartitaanermut Naalakkersuisoqarfiup ataani immikkoortortaqarfik.
Siunnersuinermi periutsit ineriartortinnissaannut nalilersuinissamullu sinaakkutissat pilersinnissaat siunertaavoq.
Immikkoortortaqarfiup ilinniartitaanermut tunngasuni siunnersuinerup pitsaassusaa ataqatigiinneralu pitsanngorsarniarlugillu siunnersuisartut tapersersortarpai.
Attaveqatigiit nunani inuusuttunut ilinniagaqanngitsunut suliffeqanngitsunullu piginnaanngorsaanermik akuutitsinermillu qulakkeerinissaq pillugu ataatsimut suliniut suliniutaasa nutaat ilagaat.
Lene Andersen Kalaallit Nunaanni siunnersuisarfimmi AQQUT-imi immikkut siunnersortaasoq nunatsinni attaveqatigiinnut akisussaasuuvoq.
Assi: AQQUT
Lene Andersen, Kalaallit Nunaanni siunnersuisarfimmi AQQUT-IMI immikkut siunnersortaasoq aamma Kalaallit Nunaanni attaveqatigiinnermut ataqatigiissaarisutut akisussaasuusoq ataatsimiinnernik aaqqissuussisuullunilu suliniummi suleqatigiissitanik pilersitsisimavoq, taakkualu ilisimasanik misilittakkanillu suliniummut 2027-p tungaanut ingerlasussamut suleqataassapput. Suliniuteqarnerup nalaani nunani tamani attaveqaataasut nunani assigiinngitsuni naapittarlutillu misilittakkaminnik avitseqatigiittassapput.
– Inuusuttut suliffeqanngitsut ilinniagaqanngitsullu ikinnerunissaat anguniarlugu, inuusuttut ataasiakkaat atugarissaarnerannut aamma kalaallit inuiaqatigiivinut iluaqutaasumik, suliniuteqarpugut. Suliniummi meeqqat atuarfianniit ilinniakkamut imaluunniit suliffimmut ikaarsaarnermi siunnersuineq, suliniuteqartuarneq aamma siunnersuisarneq sammivagut. Aammattaaq inuiaqatigiit mikisut immikkut naleqqussaasunik aaqqiissutissanik pisariaqartitsisarnerat sammivarput, taakkulu "nunaqarfimmi pissutsinut" naleqqussarneqassapput. Suliniut politikkikkut innersuussutinik kinguneqarsinnaavoq, imaluunniit misiliummik aallartitsisoqarluniluunniit ilinniartitsinermut atortunik ineriartortitsisoqassaaq, kisianni tamanna oqaatigissallugu suli siusippallaarpoq. Nunami sumi tamaani qanoq iliortoqartarnersoq, aamma inuusuttunut anguniakkat angunissaannut atatillugu siunnersortartut sunik unammilligassaqarnersut paasiniarlugu ataatsimiinnerit siulliit atorpagut.
Suliniuterpassuit ingerlasut
Kofoeds Skolep inuusuttunut suliniutaa, Sulisitsisut Peqatigiiffiat, Mind Your Own Business, Timi Asimi, Siu-Tsiu, NUIKI-mik suliniut Majoriallu Pilersitsivimmik ilinniartitsissutaa suliniutit iliuuseqartullu inuusuttunik suliffittaartitsiniarlutik ilinniagaqartitsinermilluunniit ingerlatitseqqinniarlutik suliniuteqartut ilaannaraat.
– Nunatsinni pissanganartorpassuarnik sammisaqartoqarpoq, amerlasuullu inuusuttut isumaginiartarpaat. Unammillernartitagut aamma iliuuseqarfigisinnaaniassagatsigit susoqarnera ilisimassallugu pingaaruteqarpoq, naggataatigullu peqataasut naapeqatigiinnerat misilittakkanik suleqatigisinnaasanillu oqaloqatigiinnerat nukissaqaleqqinnarpoq, Lene Andersen oqarpoq inuusuttullu ingerlaannaq suliffittaarnissaat ilinniagaqarnissaallu qularnartoq, immaqalu ataasiakkaarlugit neqeroorfigineqarsinnaasut nangilluni oqaatigaa:
– Ataasiakkaanut naleqqussakkamik siunnersuilluni imaluunniit suliniuteqarluni oqaloqateqartoqartarsinnaavoq. Meeqqat atuarfiinneq tamaat ingerlariaqqiffiusumi siunnersuinikkut oqaloqatigiinneq aallunnerussagunarparput. Suut periarfissaappat? Inuusuttunut neqeroorutit assigiinngitsut ataatsimoortillugit siunnersortinullu nunatsinniittunut inuusuttunik malittareqqiisinnaallutillu naapeqateqarsinnaasunut qanimut attaveqarneq aaqqiissutaasinnaapput.
