Avannaata Kommunia nunaqavissut soqutigisaannik pingaartitsivoq
Lars Erik Gabrielsenip takornariartitsinermi ingasattajaarneq unitsikkusuppaa, aamma ukiortaami oqalugiaammini nunaqarfiit sammineruneqarnissaat piumasaraa.
Avannaata Kommuniani borgmesterip neriuutigaa innuttaasut sapiissuseqarumaartut inuussutissarsiutinik allanik toqqaanissamut, taamaalillutik takornariaqarneq nunaqavissunit aqunneqarsinnaalissasoq.
Assi: Oscar Scott Carl
Borgmesteri Lars Erik Gabrielsen (S) siullermeerluni Avannaata Kommuniani innuttaasunut ukiortaami oqalugiarpoq.
2025-mi apriilimi kommunimut qinersisoqareermat borgmesterinngorpoq.
Oqalugiarnermini kommunimi ineriartorneq innuttaasunut qanoq iluaqutaasinnaanersoq aamma innuttaasut allanngornernut – ilaatigut silap pissusiata allanngoriartorneranut – qanoq naleqqussartariaqarnersut sammivai.
- Pinngortitalli allanngoriartornera malunnarsillualereersimasoq naleqqussartariaqalernitsinnik oqariartuuteqarpoq.
- Allanngulernerilli namminneq iliuusitsinnik pilersitsivigisimagutsigit iliuuseqartussaavugut ilaatigut piniutit eqqarsaatigalugit, piujuartitsinermik aallaavilimmik sunaluunniit inuussutissarsiut ingerlatissuarput, Lars Erik Gabrielsen oqarpoq.
Aammattaaq ilaqutariit nukittunerulernissaat aamma meeqqat inuusuttullu pitsaanerusumik illersorneqalernissaat erseqqissarpaa.
- Meeqqat angerlarsimaffiup avataanut inissinneqartartut annikillisarusuppagut, tamanna pissooq angerlarsiumaffik suleqatigilluinnarlugu eqqungaasut tamarmik misigissutitigut eqqungaasarnerat minnerpaaffissaaniitikkumallugu.
Nunaqavissut piginnittut
Avannaata Kommunia ineriartungaatsiassasoq Lars Erik Gabrielsenip oqalugiaammini eqqaavaa, kommunimi inuussutissarsiornermik ilinniarfimmik pilersitsisoqarnissaa anguniarpaa, ilaatigut aalisartunut ilinniartitsiffiusussamik takornarialerinermullu tunngasunik ilinniagaqarfiusussamik.
Ilulissani mittarfik ukioq manna ammarneqarpat kommunip tamanna pisariaqartissavaa.
- Kaammattuutigiumavara innuttaasut nunaqqatigut inuussitissarsiummut tassunga ikaarsaanngikkunik pilersitsinissamut sapiissuseqarlutik iliuuseqalissasut, piginnittuusussaavusimi aammalu ilissi inuussutigisussaallugu pigaarsi avataaneersullu killilerneqartariaqalerput, Lars Erik Gabrielsen oqarpoq.
Nunaqavissut najukkaminniittunik suleqateqartarnissaat borgmesterimut pingaaruteqarpoq.
- Innuttaasut tamarmik najukkaminni inissialiornissaat pingaartissavarput, nunaqavissunulli ukiup ilaannaani atorneqartussanik inissianik pisinissaq ajornakusoorpallaarpoq, nunaqavissut inissanik amigaateqarmata, oqarpoq.
- Taamaattumik Naalakkersuisut kaammattorumavakka bopælspligt tassalu najugaqarnermik uppernarsaaneq atorlugu, illunik pisisinnaaneq eqqunneqassasoq ukiullu qulit amerlanerilluunniit najugaqartuusimasuunissaq ilanngullugu, nunammi allat takornariaqarnermik annertuumik ingerlataqartut ajornartorsiutaat uagut nangiinnagassarinngilagut aaqqereerneqartariaqarput innuttaasut eqqarsaatigalugit tamakkuummata aamma akinik qaffassaasut.
Aamma nunap avataanit suliartortut akileraarutitigut tapiissuteqaratik aningaasarsiortartut atorunnaarsinneqartariaqarsorai.
Sakkulersorneq annikillisillugu
Naak qilanaarisinnaasarpassuaqaraluartoq aamma unammilligassaqarpoq. 2025-mi nunanit tamalaanit Kalaallit Nunaat soqutigineqarluaraluartoq, Avannaata Kommunia inuuniarnikkut inuussutissarsiutitigullu pitsanngorsaanernik malugisaqarsinnaanngilaq, borgmesteri oqarpoq.
- Immikkut aasit inissisimanerput ersarippoq, politikkikkut inissisimanerluppugut aaliangiisartullu assut ungasittutut misigisimanarlutik aaqqiissutissanik ujartuiniarnermi, ikuallaaveerannguit pilersiortorusunnerini assersuutissaqqippoq, Lars Erik Gabrielsen oqarpoq.
Misigivoq Folketingimut ilaasortat oqartussaasullu qitiusumik inissisimasut sakkulersorneq isumannaallisaanerlu pillugit apeqquteqaraangata kommuni pingaaruteqannginnerutinneqartartoq.
Taamaattumik nunaqarfiit puigorneqartarlutik. Eqqagassalerineq pillugu oqallinneq assersuutissaavoq.
- Eqqiluitsumik piujuartitsinissamillu inuuneqassagutta illoqarfiit nunaqarfiillu tamarmik ikuallaaviit namminneq atorlugit aaqqiissutissaqartariaqarput. Naalakkersuisut suleqatigiinnernik isumaqatigiissuteqaraangata nunaqarfiit ungasissullu pitsaanerusumik sanaartornermut, imeqarnermut, kuuffinnut inissiallu pillugit salliutinneqarnerusariaqarput.
Ilaatigut nunaqarfiit puigorneqartarnerat eqqaavaa. Eqqaavinnik isumaginninnermut oqallinneq tassani assersuutigalugu.
- Nunaqarfiimmi misigitinneqartuarsinnaanngillat qaquguugaluarnersoq matuneqartussatut, taakkumi nunatsinnut annertuumik pilersueqataapput sineriassuarpullu inoqartillugu.
Lars Erik Gabrielsenip naggataatigut innuttaasut tamaasa ukiortaami pilluaqquai.
