Bitten Heilmann Maniitsumi nalliuttorsiutigineqartoq

Maniitsumi Majoriami pisortaq Bitten Heilmann, ukiuni 40-ni sulinera pillugu nersorniarneqarpoq – oqalugiartoqarpoq, erinarsortoqarpoq, tamussiussassanik sassaalliisoqarpoq, suleqatai ilaqutaalu peqataallutik, Qeqqata kommunia Facebookkimi quppernermini allappoq. 

Bitten ukiorpassuit ingerlaneranni misilittagarpassuaqalernikuuvoq aammalu suliffeqarfinni amerlasuuni soorlu Royal Greenland, Namminersornerullutik Oqartussat, KNI, Piareersarfik, Maniitsumi Efterskole nuannarisaalu Majoriaq sunniuteqarnikuuvoq, Qeqqata kommunia nalunaarummi allappoq. 

- Bitten ukiut 40 ingerlanerini assigiinngitsunik atuuffeqarnikuuvoq kisianni aqutsisuunissamut piumassuseq nuannarinerullugu, suliffeqarfinni assigiinngitsuni ingerlannikuusani.

- Ukiorpassuit matuma siorna Royal Greenland allannikuuvoq Bitten "aalajaatsuuvoq, silappaarissoq sullisserusuttorlu". Bitten suleqatiginerani uanga oqaatsit taakku ilisarisinnaavakka. Pitsaassutsimik, eqqortuunermik, piffissaatillugu tunniussisarpoq aammalu "annikitsualuit aqussinnaallugit"!, ilinniartitaanermut pisortaq Carl-Otto Borup oqarpoq.