Blok 5-imi suliami illersuisoq: Unnerluutigineqartup qularneq iluaqutigissavaa

Eqqartuussisoqarfik Sermersuumi eqqartuussisup eqqartuusseqataasullu suliaq aalajangersimasoq ulluni sisamani suliarereerlugu naggataarutaasumik oqaaseqaatit tusartussanngorpaat. Unnerluussisussaatitaasoq Aprilia Jespersen siulliuvoq, taassumalu angutip 42-nik ukiullip toqutsisimasutut pisuutinneqarnissaa sooq kissaatiginerlugu tunngavilersussavaa.

- Angut toqutsisimasutut unnerluutigineqartoq imminut illersorusunnginnera eqqarsarnartoqartippara, oqarpoq. Unnerluunneqartup suliap ingerlanerani oqaaseqarusunnginnera pillugu oqarpoq.

42-nik ukiullip suliami pisuusimasinnaanerut misissueqqissaartartut uppernarsaataat unnerluussisussaatitaasup saqqummiuppai.

- DNA-va, inuaasa assaasalu ipai pinerluffiusumi, toqungasup siumorneqarfiani assigiinngitsunilu eqqaaniittuni nassaarineqarput, Aprilia Jespersen oqarpoq.

Unnerluussisussaatitaasup unnerluutigineqartoq qatanngutimini Blok 5-imi najugaqartumi unnuiniarluni unnuaq taanna 2024-mi pilersaaruteqarsimagaluartoq aamma eqqaavaa. Isersinnaannginnami pequusivimmi sinissalluni aalajangerpoq.

Tassani angut 20-nik ukiulik, madrassit qaanni sinilereersoq, naapippaa. Angullu tassani kamarujussuarsimassasoq unnerluussisussaasoq isumaqarpoq:

- Toqungasoq kiinnamigut sakkortuumik persuttarneqarsimavoq — ikinnerpaamik 19-eriarluni ujaqqamik anaaneqarsimalluni. (...) Unnerluutigineqartup pinerluffigineqartoq nakuuserfigineqarnini toqqutigisinnaagaa nalusimassanngikkaluarpaa, oqarpoq.

42-nik ukiulik sapaatip-akunnerata siulianiutut nipaqarani issiavoq, tujuulualu taartumik qalipaatilik qaamasumik taarsersimalluni. Maanna eqqissisimannginneruvoq, sulili uneqqissaarluni issialluni.

Alla pasineqartoq

Eqqartuussissuserisoq Marie Louise Frederiksen maanna oqaaseqartussanngorpoq:

- Qularutigineqarsinnaasut tamarmik unnerluutigineqartup iluaqutigissavai, aallarniutigalugu oqarpoq.

Misissueqqissaartartut nassaavi kia toqutsisuuneranik takussutissiinngitsut illersuisoq oqarpoq. Allamik pissuteqarluni tassaniissimasinnaanerat, soorlu ilisimannittup immikkut ilisimasallip sapaatip-akunnerata siuliani nassuaanermini oqaatigisaatut, oqaatigaa.

Marie Louise Frederiksenip sullitami DNA-vanik nassaartoqarsimasoq, aammali inunnit allanit DNA-nik nassaartoqarsimasoq naqissuserpaa.

Aamma toqutsinermi atorneqartumi pingaarnerpaami — ujaqqamik toqutsinermi sakkuusorineqartumi — angutip 42-nik ukiullip DNA-vanik nassaartoqanngilaq.

Marie Louise Frederiksen politiit suliami inuk alla suli pasigaat, tamannalu sullitami pisuuneranik qularnerulersitsisoq, isumaqarpoq.

- Politiit suli pasinninnerat eqqarsaatigisassaavoq. Taassuma toqutsisuunnginnera qularutiginngikkaanni pasineqarunnaarsimassagaluarpoq, oqarpoq.

Eqqartuussiviup angut 42-nik ukiulik angummik inuusuttumik ujarak atorlugu toqutsisimasutut pisuutissappagu, toqussutaasumik nakuusersimasutut toqutsinertuunngitsoq inernilerneqassasoq, taanna isumaqarpoq.

Pineqaatissiissutissaq isumaqatigiissutigigaat

Unnerluussisussaatitaasorli illersuisorlu pingaarutilimmi isumaqatigiipput: Angut pisuutinneqassappat tarnimikkut nappaatilinnut immikkoortortaqarfimmiittussanngorlugu pineqaatissinneqassasoq, tassa nalinginnaasumik inissiisarfimmiittussanngortinneqarani.

- Unnerluutigineqartoq napparsimasoq maannalu Danmarkimi napparsimmavimmiittoq, nakorsaatitigut pitsaasumik katsorsarneqarlunlu siuariartortup taamatut aalajangiiffigineqarnissaa nalunanngilaq, Aprilia Jespersen oqarpoq.

Angut eqqartuunneqarnissani sioqqullugu Aarhus Universitetshospitalimi tarnip pissusaanik ilisimasallit immikkoortortaqarfianni R3-mi uninngavoq.

Angut 42-nik ukiulik Nuussuarmi arnamik juulimi 2024-mi nakuusersimasutut aamma unnerluutigineqarpoq.

Ilisimannittut suliami tassani taamaatinneqarput, taamaattumillu pinngitsuutinneqassagunarluni. Unnerluutigineqarnera suli attanneqarpoq, taannalu eqqartuussivimmi aamma aalajangiiffigineqartussaalluni.

Eqqartuussisoq suliaq aqagu marlunngornermi nalunaaqutaq 14.00 aalajangiiffigineqassasoq oqarpoq.