Blok 5-imi toqutsineq eqqartuussivimmi suliarineqassasoq: Paasissutissat nutaat saqqummiunneqarput

Politiit 2024-mi oktobarip sisamaani ullaakkut nalunaaqutaq 10.22 Nuummi Blok 5-imut aggersarneqarput, tassani innuttaasut ilaata angut 20-nik ukiulik pequusiviup iluani toqungasoq nassaarisimavaa.

Aallaqqaammut pasinartumik toqusimasutut oqaatigineqarpoq, kingornali uissuumminartumik toqutsisoqarsimaneranik sulianngortinneqarpoq. Suliaq Sermersuup Eqqartuussiviani Nuummiittumi ataasinngornermi ullaakkut aallartippat piareersimassaagut.

Angut 42-nik ukiulik toqutsisimasutut pisuusoq, Danmarkimilu tarnimikkut napparsimmavimmut unitsinneqartariaqartoq unnerluussisussaatitaasoq isumaqarpoq.

– Sullitara pisuunnginnerarpoq, illersuisoq Marie Louise Frederiksen eqqartuussinissaq sioqqullugu oqarpoq.

Sakkoq

Kinaluunniit 20-nik ukiulimmik toqutsisimagaluarpat, politiit misissuinerisa inerneri unnerluussummi allaatigineqarput.

Angutip inuusuttup niaqua kiinaalu „sakkulerluni“ arlaleriarluni anaaneqarsimasoq allassimavoq. Tamatuma kingorna ilumigut aanaartoorluni toquvoq.

Sakkulli sorpiaat atorlugit qaqugukkullu pinerluttuliortoqarsimanersoq paasineqarsinnaasimanngilaq. Pinerlunneq 2024-mi oktobarip aappaata sisamaatalu akornanni pisimassasoq allassimavoq.

Angut ataaseq kisiat ataasinngornermi ullaakkut eqqartuussivimmi unnerluutigineqartoq aamma soqutiginarpoq. Tassami 2024-mi angutit marluk toqutsisimasutut tigusarineqarput.

Tamanna allarpassuillu Nuummi eqqartuussineq aallartereerpat sammissavagut.