Blok M-imi toqutsisimasutut unnerluutigineqartoq: - Toqutsinissara siunertarinngilara

Angut 30-nik ukiulik Ceresvejimi Blok M-imi siorna toqutsisimasutut unnerluutigineqartumut suliaq. Eqqartuussisoqarfik Sermersuumi marlunngornermi ullaakkut aallartippoq. Angut naatsunik nujalik taartumillu nasartalimmik tujuulik eqqartuussiviup initaani 3-mi Nuummiittumi issiavoq.

Unnerluussissut naapertorlugu angutip aapparisani arnaq 44-nik ukiulik 2025-mi sisamanngornermi aggustip 7-anni unnuap qeqqata kingorna unatarlugulu qimippaa.

Angutip arnaatini Blok M-imi najugaqatigisimallugu oqaluttuarpoq, ilaannikkullu oqqattarsimallutik. Unnummi tassani pulaartoqarsimapput aalakooqatigisaminnik, kingornalu aaqqiagiinngissuteqalersimallutik.

Angutip nassuiaataa naapertorlugu arnap iffiukkanut savilerluni ornippaa. Savik sumiiffimmi nassaarineqarpoq:

- Kapiniarlunga oqarfigaanga, imminullu illersorniarlunga qungusiatik toqqillugu ajappara, unnerluutigineqartoq oqarpoq.

Angut toqutsisimasutut ullaaq eqqartuussivimmi nassuissasorigaluarparput, taamaaliornianngitsorli maanna paasinarsivoq:

- Toqunnissaa siunertarinngilara, unnerluutigineqartoq oqarpoq.Nassuiaatit assigiinngitsut

Nassuiaatit assigiinngitsut

Angutip 30-nik ukiullip eqqartuussivimmi maanna nassuiaanera aamma aggustimi 2025-mi politiinut nassuiaataa assigiinngissuteqarput.

Aappani persuttarsimallugu minutsinilu arlaqartuni qimissimallugu taamani oqarsimaneraniit allagaatit atuarneqarput. Qimissimanagu maanna oqaatigaa, qungasiatigulli sivikitsumik naqissimallugu.

Pisumi tassani annaaniarlugu aamma uummarsarsimagaluarlugu oqarpoq, naak politiinut taamaliornikuunani oqaatiginikuugaluarlugu.

Unnerluussisup Kristian Buskovip sooq taamani allatut nassuiaasimariarluni maanna allatut oqaluttuarnersoq aperaa.

- Naluara, tuparujussuaqqavunga, unnerluutigineqartoq akivoq.

Piffissaligaanngitsumik paarineqarnissaa piumasarineqartoq

Unnerluussisup pinerluffimmiit assit takutillugillu inuup toqungasup timaanik misissuisartut nalunaarusiaat saqqummiuppaa. Qiminneqarnini toqqutigisimagaa tassani nalilerneqarpoq.

Kristian Buskovip angutip allatut maanna nassuiaateqarnera uppernarsaatinit saqqummiunneqartunut qanoq atassuserneqarsinnaanersoq apeqqutigaa. Angutip nassuiaatini attappaa:

- Qungasiatigut naqikkakkut siniffimmut uppippoq ... nikeqqiganilu, oqarpoq.

Unnerluutigineqartoq nassuiaareerpat ilisimannittut killisiorneqarlutillu uppernarsaatit takutinneqassapput.

Unnerluussisup eqqartuunneqartup piffissaligaanngitsumik paarisassanngortinneqarnissaa aamma tunngavilersussavaa. Tassa suliami pisuusutut nalilerneqassappat.