QEQQATA KOMMUNIA

Borgmesteri Malik: Qaagitsi taasiartoritsi - pingaaruteqarpoq

Sallaatsumik oqaatigalugu borgmesteri Malik Berthelsen pakatseqqavoq kommunip innuttaasunik taasisitsinerani maannamut taasiartorsimasut ikittuinnaanerat pillugu. Sisamat qaangilaarnerani taasisinnaasut 26 procentii Sisimiuni taasiartorsimapput Maniitsumilu taasisinnaasut 31 procentii taasiartorsimallutik.

Borgmester Malik Berthelsenip innuttaasut Sisimiuni katersortarfimmi utaqqivai. Taanna kommunimi innuttaasunut taasisinnaasunut tamanut kaammattuuteqarpoq Qeqqata Kommunia ullumikkutut iluseqarluni ingerlaqqissanersoq imaluunniit avittoqassanersoq taasiartoqqullugit - Qaagitsi taasiartoritsi, tamanna pingaaruteqarpoq, taanna kaammattuivoq.

Asseq: Qeqqata Kommunia

Jensine Berthelsen Jensine Berthelsen Tusagassiortoq

Saqqummersinneqarpoq 26. Novembari 2025 - 17:03

Oqallinnerpassuit pisimapput Maniitsup Sisimiullu akornanni kommunip aaqqissuussaanera pillugu, oqartoqarsinnaavorlu oqallinneq 2009-mi kommunit kattunnerat pimmalli aallartittoq.

Oqallinnerup ilarujussua akerleriinnermik aallaaveqarsimavoq, amerlasuutigullu Maniitsup Sisimiullu avissaartariaqarnerannik oqariartuutigineqartarluni.

Ullumikkut pingasunngornermi Sisimiuni, Maniitsumi, Napasumi, Atammimmi, Kangaamiuni, Itillimi, Sarfannguani Kangerlussuarmilu qinersisinnaatitaasut taasinissaminnut periarfissaqarput.

Ussassaarut

- Oqallinneq annertooq eqqarsaatigalugu, pingaartumik Maniitsumiit piumasaqaatit ingerlaavartut eqqarsaatigalugit, taasisitsinermi maannamut qinersisartut amerlanerusut takkutinnginnerat pakatsissutigilaarpara, kommuni ullumikkutut ingerlaannassanersoq imaluunniit Maniitsoq namminerisaminik kommuninngussanersoq taasissutiginissaanut ullumikkut periarfissaammat, borgmesteri erseqqissaavoq.

Taaseqataasut maannamut ikittuaraannaasut

- Nalunaaqutaq 16:00 qaangilaarnerani Sisimiuni qinersisartut 26 procentiinnai taasiartorsimapput, Maniitsumilu 31 procentii taasiartorsimallutik, oqallinneq ukiuni arlalinni ingerlanikuusoq eqqarsaatigalugu tamanna pakatsinalaarpoq.

Taasiartorfiilli nal. 20:00 tikillugu ammassapput, borgmesterilu kissaateqarpoq qinersisinnaasut sapinngisamik tamarmik takkullutik taaseqataassasut:

- Qassi procentit taasisimanissaannut ammut killeqanngikkaluartoq, isumaqarpunga suliassaq taama pingaaruteqartuusoq, taasisoqareerneratigummi inernerit ingerlariaqqinnissatsinnut sakkussarisussaassavagut, tamannalu siunissami sulinermi atorneqarsinnaalluni, taamaattumik pingaaruteqarpoq taasisut procentii qaffasinnerulernissaat, Malik Berthelsen (S) tinnersaavoq.