MITTARFIK NUTAAQ
Borgmesteri suaarutiginnippoq: Borgmersteriusimasoq mittarfiup aqqutaanut atsiunneqarpoq
Qaqortumi mittarfimmut aqqut Henrik Lundip Aqqutaatut atserneqarpoq, borgmester Malene Vahl Rasmussen mittarfiup atoqqaartinneqarnerani oqarpoq.
Malene Vahl Rasmussen atoqqaarfissiornermi oqalugiarpoq.
Assi: Oscar Scott Carl
Qaqortup mittarfiata atoqqaartinneqarnerani Kommune Kujallermi borgmesteri Malene Vahl Rasmussen sisamanngornermi ullaap tungaani oqalugiarniarluni nuimmat nuannattoqarlunilu hurraartortoqarpoq:
- Kiisami. Qaqortumi mittarfittaarnissaq isumassarsiarineqareersoq inunngorpunga, borgmesterip oqalugiarnini aallarnerlugu oqapoq, nangipporlu:
- Mittarfik pillugu oqallinneq meeraaninni inuusuttuuninnilu ingerlavoq. Inersimasunngorninnilu oqalliseqataasinnaallungalu suliniummut peqataavunga. Suliaq sivisusimavoq.
Borgmesterip suliniummik sukataaruteqarnikoq immikkut eqqaavaa:
- Mittarfiliornissaq ukiuni 40-ni oqallisigineqarpoq. Politikerit arlallit suliniummut peqataasimasut ullumi najuupput, amerlasuulli aamma peerutereernikuullutik. Qaqortumili borgmesteriusimasoq Henrik Lund immikkut eqqaarusuppara, taanna ukiuni 20-ni borgmesteriunermini Qaqortumi mittarfiliornissap kissaatigineqarneranik aallartitsivoq, Malene Vahl Rasmussen oqarpoq.
Mittarfimmut aqqut tassunga atsiunneqassasoq suaarutigaa.
- Henrik Lund ataqqiniarlugu Qaqortup mittarfianut aqqut Henrik Lundip Aqqutaanik ateqassasoq saqqummiuppara. Oqaluttuarisaanermi pisumi matumani pingaaruteqarluinnartuuvoq, borgmesteri oqarpoq.
Qaqortumi mittarfittaap isumalluarfigineqarlunilu nuannaarutaanera naggasiutigaa:
- Nuannaarnersi malugisinnaavara. Qamannga pisumi nuannaaqigama malugisinnaavara. Mittarfik nutaaq isumalluarfigaara. Attaveqaqatigiinnermut periarfissanik pitsaanerusunik pilersitsissaaq kommunimilu ineriartortitsissalluni. Islandimut aqquteqalerpat Qaqortoq nunarsuup sinneranut ammassaaq. Tamassi pilluaritsi!
