Borgmesteri unnuami politiini alapernaarsueqataasoq

- Pisut atuaannassalugit uanntu naammanngilaq. Piviusoq politiit misigisartagaat takorusullugulu malugerusuppara.

Taama Kommune Kujallermi borgmesteri Malene Vahl Rasmussen (D) kommunip nittartakkakkut qupperneranut oqarpoq, tassanilu borgmesterip sapaatip akunnerata naanerani kingullermi politiinik alapernaarsueqataasimanera takuneqarsinnaavoq.

Borgmesterip piviusoq politiit misigisartagaat malugerusuppaa:

– Alapernaarsueqataagaanni taakku sulinerat inuillu pisullu naapittagaat allarluinnarmik paasinarsisarput, borgmesteri Malene Vahl Rasmussen oqarpoq.

Borgmesterip ulluinnarni kommunimi pisut politiit ullormut nalunaarusiaatigut atuartarpai, unnuaaneranilu alapernaarsuisunik peqataanermi politiit ulluinnarni atugaasa qanimut misiginissaannut periarfissarsivoq:

- Politiit angalaarnerminni naapittagaat aamma uagut sulianik nangitassatsinnik paasissutissiisarput. Innuttaasutsinnut toqqissisimanerunermik pitsaanerusumillu atugaqarnissamik pilersitsiniarutta, piviusumi ajornartorsiutit paasisariaqarpavut, Malene Vahl Rasmussen oqarpoq imalu nangilluni:

- Politiit qanittorujussuarmik pingaaruteqartorujussuarmillu suleqatigaavut taakkulu ullut tamaasa suliaat qujaruteqaakka. Pisariaqartinneqaleraangamik takkuttarput, pissutsinilu imaannaanngitsuniikkajupput. Annertuumik nersualaarneqartariaqarput, Malene Vahl Rasmussen oqarpoq.