FOLKETINGIMUT QINERSINEQ 2026
Brobergip qineqqusaartussani saqqummiuppai
Partiip naleqartitai tallimat Inatsisartunut qinersinermi saqqummiunneqartut attatiinnarneqarput. Kalaallit Nunaata naligineqarnissaa sulissutigineqarpat kulturi, kinaassuseq kalaallillu naleqartitaat qitiutinneqassapput, siulittaasoq naqisussiivoq.
Pele Brobergip Folketingimut sassartut saqqummiuppai. Partiip naleqartitai tallimat aamma Folketingimi atuupput, siulittaasup oqaatigaa.
Assi: Arnaq Nielsen
Naleqqap siulittaasuata Pele Brobergip Folketingimut qinigassanngortittut sisamat ataasinngornermi ualikkut saqqummiuppai.
Naleqqameersumik qinersineq partiimut politikkikkut taasineruinnaanngitsoq, tassaasorli kalaallit kinaassusiat naleqartitaallu pillugit taasinerusoq, Pele Brobergip saqqummiussinermini erseqqissarpaa.
- Qineqqusaartugut annertuumik tatigaakka. Kalaallit Nunaat sinnerlugu Folketingimi erseqqissumik oqariartuuteqartarnissaq qulakkeerniarlugu iliuuseqarnissaminnut piareersimapput, oqarpoq, nangillunilu:
- Kikkut tamarmik Kalaallit Nunaat malinnaaffigaat. Aningaasaqarnermut, ineriartornermut siunissatsinnullu tunngatillugu arlalinnik sunniiniartoqarpoq. Ataaserli qularutigineqassanngilaq, kalaallit nunatta siunissaanik aalajangiisinnaatitaapput. Tamannalu sulissutigissavarput, Naleqqami siulittaasoq Pele Broberg saqqummiussinermi oqarpoq.
Naleqqap politikki tallimanngorpat itisilissagaa aamma oqaatigaa.
Qinersinermut pingaarutilimmut sassartut sisamat
Naleraq Folketingimut marsip 24-ani qinersisoqarnissaanut sisamanik maanna qinigassanngortitsivoq.
Taakku tassaapput:
- Najannguaq Hegelund, inuiaqatigiinni filosofiimilu ilinniarsimasoq, atorfilittut misilittagalik.
- Karina Zeeb, inatsisilerituujuvoq kalaallit inatsiseqarnerannut ilisimasalik.
- Oliver Bech, 20-nnarnik ukioqaraluarluni politikkimi ukiuni arlalinni misilittagaqalereersoq.
- Juno Berthelsen, Inatsisartut ilaasortaq, nunanut allanut tunngasunut suliaqarnermi misilittagaqarluartoq.
Pele Brobergip Folketingimut qinersineq aamma Kalaallit Nunaannut pingaaruteqarluinnartoq saqqummiussinermini erseqqissarpaa.
- Tamannalu Kalaallit Nunaata nunarsuarmi inissisimaffia nunanit allanit soqutigineqarnerulerneranut pissuteqarpoq. Ukiorpassuarni iligisat Kalaallit Nunaat ilungersunartumik inissippaat. Kalaallit Nunaata siunissaa kalaallit aalajangissagaat pingaaruteqarpoq. Amerika, Danmark Europaluunniit aalajangiisuussanngillat, Pele Broberg oqarpoq.
