Burnham Downing Streetimi oqalugiaammini siullermi tuluit aningaasaqarnikkut oqilisaannissamik neriorsuivoq

Tuluit Nunaanni ministeriunertanngorlaaq, Andy Burnham Londonimi Downing Street 10-p silataani oqalugiarnermini siullermi, taama oqartoq, The Guardian aamma BBC taama allapput.

- Tuluit Nunaannut pilersaarut nutaaq ukioq manna kingusinnerusukkut saqqummiutissavara. Ukiunut qulinut pilersaarut. Apeqqutaatinnagu qanoq parteeqarnerluta maannakkut inissisimaffigisatsinnit, isumaga malillugu tamatta siunissami Tuluit Nunaata inissisimaffigisariaqagaatut angorusutatsinnut aqqutissaq, pilersaarutip takutissavaa, Burnham oqarpoq nangillunilu:

- Inuuniarnermili aningaasartuutinut ikiuutissat maannakkut annerusumik iliuuseqarfigisinnaanngilakka. Suliniutit ilaat, qanoq aningaasalersorneqassanersut aqagu saqqummiutissavakka.

Burnham 56-nik ukiulik kunngi Charlesmit ualinerani Tuluit Nunaata ministeriuneratut nutaatut ilassineqarpoq.

Taassuma Keir Starmer ministeriunertut sulisartullu partiianni siuttutut kingoraarpaa.

Inuusuttut amerlanerusut sulilernissaat Burnhamip politikkikkut anguniagaasa ilagaat.

- Ilinniartitaanermik aaqqissuussinerup allanngortinneratigut, tapersersuinerunikkut, eqqarsartaatsikkullu peqqissusaannik pitsaanerusumik ikiuiniarnikkut, aamma inissialiornerit amerlanerulersinnerisigut, inuusuttut sulilernissaannut ikiussavavut, Burnham oqarpoq.

Ministeriunertut nutaatut naalakkersuisunik nutaanik taanna pilersitsissaaq. Keir Starmerip tunuarneratigut naalakkersuisoqatigiit atorunnaarsinneqarput.

- Inuit ajunngitsumik inuuneqalernissaannut ikiuukkumavugut, pisortat aaqqissuussaanerat pitsaaliuinerulersinniarlugu inuillu iluatsilluarnissaat aningaasaliiffiginiarlugu, iluatsinngitsoortut akiliuteqinagit, Andy Burnham oqarpoq.

Tuluit Nunaanni politikkikkut aningaasaqarnikkullu nutaamik aaqqissuussisoqaqqittariaqartoq, taanna isumaqarpoq. Taassuma Tuluit Nunaanni inuiaqatigiinnut sunniuteqarnerluttunik, kukkusunik aalajangiiffiusutut ukiuni qulikkaani 1980-kkut tikkuarpai.

- Politikkikkut pissaaneq eqiterunneqarsimavoq, aningaasaqarnikkut pissaaneq namminersortunngorsarneqarsimavoq, nioqqutissiorneq piuneerutsinneqarsimavoq, tamannalu suli aaqqinneqarsimanngilaq. Inuppassuit kinguariartortutut misigipput, pissutsillu allanngortitsisinnaanatik.

- Taamaattumik politikkimik ingerlatsinerput allanngortissavarput, suleqatigiinneq pingaarnerutilerlugu, ajornartorsiutinik aaqqiiniarneq pingaarnerutillugu, pointinnanniarneq pinnagu, Burnham oqarpoq.

Tuluit Nunaanni ukiut qulit ingerlaneranni Andrew Burnham ministeriunerni arfineq-aappassaraat.

RITZAU