Canadamiit tikeraartoqarnissaa taamaatinneqartoq

Nuummi silarlunneranit timmisartuussinissat ajornakusoormata Canadap nunanut allanut ministeriata Anita Anandip tikeraarnissani taamaatippaa.

Canadap nunanut allanut ministeriata Anita Anandip tikeraarnissani kinguartinneraa taamaativinneraaluunniit suli paasissutissiissutigineqanngilaq.

Assi: Mandel Ngan/Reuters/Ritzau Scanpix

Hanna Hviid Hanna Hviid Tusagassiortoq

Saqqummersinneqarpoq 14. Novembari 2025 - 11:33

Canadap nunanut allanut ministeria Anita Anandip Nuummut sapaatip-akunnerani uani tikeraartussaagaluarpoq, tassanilu sinniisoqarfik nutaaq ammartussaagaluarpaa.

Tikeraarnissarli Nuummi silarlummat taamaatiinnarneqartoq Canadamiut nunanut allanut ministereqarfianni attaveqaqatigiinnermut pisortaq oqarpoq.

Nuummi sisamanngormat anorersuarnissaa ilimasaarutigineqarmat timmisartuussinissat tamarmik taamaatiinnarneqarput.

Ussassaarut

Anita Anand Nuummut tikeraarniartoq nunanullu allanut tunngasunut naalakkersuisoq Vivian Motzfeldt (S) aamma qallunaat nunanut allanut ministeriat Lars Løkke Rasmussen (Venstre) ataatsimeeqatiginiaraat, CBC News marlunngornermi allappoq.

Lars Løkke Rasmussenilli tikeraarnissaa Sermitsiamit uppernarsarneqarsinnaasimanngilaq. Nunanut allanut tunngasunut naalakkersuisoqarfimmiit oqaaseqartoqarumanngilaq, nunanut allanut tunngasunut ministereqarfik saaffiginnissutitsinnut akissuteqanngilaq.

Anita Andandip tikeraarnissaralua kinguartinneqarnersoq suli paasissutissiissutigineqanngilaq.