Cannabis
inerteqqutaajunnaarnissaanut siunnersuutip pileqqaarfiani, AG-mit
allaaserineqarsimasumi, anngiortumik tuniniaaneq naalagaaffimmik
aqunneqartumik tuniniaanermik akiorneqarsinnaasoq, Aqqaluaq C. Jerimiassenip tunngavilersuutigaa.
Siunnersuulli Inatsisartuni partiinit allanit annertuumik
qularineqarpoq. Jerimiassen oqallinnerup kingorna politikkikkut pissutsit
nalilersoreerlugit siunnersuummik tunuartitsiniarluni aalajangerpoq.
Cannabis
inerteqqutaajunnaarnissaanut siunnersuutip pileqqaarfiani, AG-mit
allaaserineqarsimasumi, anngiortumik tuniniaaneq naalagaaffimmik
aqunneqartumik tuniniaanermik akiorneqarsinnaasoq, Aqqaluaq C. Jerimiassenip tunngavilersuutigaa.
Siunnersuulli Inatsisartuni partiinit allanit annertuumik
qularineqarpoq. Jerimiassen oqallinnerup kingorna politikkikkut pissutsit
nalilersoreerlugit siunnersuummik tunuartitsiniarluni aalajangerpoq.
- Siunnersuutiga Inatsisartuni partiinit allanit
tapersersorneqanngitsoq paasinarsivoq. Cannabisip inerteqqutaajunnaarnissaa
pillugu politikkikkut oqaloqatigiinnissamut piumassuseq amigaataavoq, Aqqalu C. Jerimiassen oqarpoq.
Politikkikkut pissutsit maanna atuuttut eqqarsaatigalugit siunnersuut tunuartinneqartoq, suliarli ajorsarnertut tiguneqarani suut anguniarnissaanut nukissat atorneqarnissaanut tunngassuteqartoq Aqqalu C. Jerimiassen oqarpoq.
- Siunnersuut oqaluuserisassanut ilanngunneqareeraluartoq, nukikka
allamut atorniarlugit aalajangerpunga. Siunnersuutip
itigartinneqarnissaa ilimanaateqarmat, suliassat
angusaqarfiusinnaasut pingaarnersiorlugit piffissamik
atuiffigerusuppakka. Siunnersuutip tunuartinneratigut, inatsisissatut siunnersuutit allat suliarinissaanut
piffissaqarnerulissaagut. Inatsisissatut siunnersuutip
akuerineqarnissaanut annikinnerusumik periarfissaqartumut nukinnik
atuinngikkaluarluta, Atassutip siulittaasua nassuiaavoq.
Pisarialimmik oqaloqatigiinnerup aallartinnera
Naak partiit allat nalunaarutaat aallaqqaammut akuersaanngitsutut
nipeqaraluartut, siunissami partiit akimorlugit suleqatigiinnissamut
Aqqalu C. Jerimiassen mattussinngilaq. Taassuma inersuarmi
isumaqataasoqarsinnaanera suli neriuuteqarfigaa, piffissarli eqqortoq
utaqqineqarsoraa.
- Inerteqqutaajunnaarsitsinissamik kisiartaallunga sorsuuteqarnera
naqissuserusunngikkallarpara. Suleqatima isumaat siumut
naqissuserusunngilara, immaqami politikerinik allanik inersuarmi
suliassamik kivitsinissamut piareersimasunik issiasoqarpoq. Oqallinneq pisarialik
aallartissallugu uannut pingaaruteqarnerpaajuaannarpoq, Aqqalu C. Jerimiassen oqarpoq.
Oqallisigineqartariaqartoq
Naak inatsisissatut siunnersuut maanna tunuartinneqaraluartoq,
oqallinneq tamaanga killeqassanngilaq. Akerlianilli Aqqalu C.
Jerimiassenip suliassaq nutaamik saqqummiunniarpaa, taamaalilluni
partiit allat naalakkersuisullu, sukkasuumik taasinermik
qaagiinnarneqarsinnaanngitsumik isummersortariaqalissapput.
- Inatsisissatut siunnersuummik toqqaannartumik saqqummiussinissaq
pinnagu, apeqquteqaat aallaavigalugu oqallinnissamut siunnersuummik
ukiuni tulliuttuni saqqummiussinnaanera maanna eqqarsaatigaara.
Tamanna periusissiatut sakkussiaavoq, ataatsimiittarfimmi
toqqaannartumik ammasumik oqallinnermik qulakkeerinnissinnaasoq.
Taamaaliornikkut sammisaq saqqummiunneqassaaq aamma Naalakkersuisut
peqataatinneqarnissaat qulakkeerlugu apeqqummut pisortatigoortumik
isummersittariaqalersissallutigit, Aqqalu C. Jerimiassen nassuiaavoq.
Sukumiinerusumik eqqartorneqartariaqartoq
AG-p partiit tamaasa oqaaseqartikkumallugit attaveqarfigai,
mannali tikillugu Inuit Ataqatigiit kisiartaallutik akissuteqarput.
Inuit Ataqatigiinnit siunnersuutip qanoq sunniuteqarsinnaanera
ilisimaneqarpoq, mianersortoqarnissaali partiimiit
kaammattuutigineqarpoq. Tamannali isumaqanngilaq oqallinneq
akuersaarnermik itigartitsinermillu naggaserneqassasoq,
inuiaqatigiinnut assigiinngitsumik sunniuteqangaassammat.
- Soorunami tamanna partiitta iluani eqqartorsimavarput,
imaaliallaannarlunilu tamanna aalajangiiffigineqarsinnaanngilaq.
Cannabisip inerteqqutaajunnaarneratigut allarpassuit eqqugaassasut
isumaqarpugut. Taamaattumik maannakkut aalajagiisoqartinnangu
sukumiinerusumik oqaluuserineqartariaqartoq, Paarma Lund Kreutzmann
(IA) nassuiaavoq.
