Inatsisartut upernaakkut ataatsimiileruttorput ilaatigullu cannabisip inerteqqutaajunnaarnissaanik siunnersuut oqaluuserineqassalluni.
Punkt 119 Inatsisartut upernaakkut ataatsimiinneranni oqaluuserineqassaaq. Oqaluuserisassaq cannabisip inerteqqutaajunnaarnissaanut tunngavoq, siunnersuuteqartuuvorlu Atassutip siulittaasua Aqqalu C. Jerimiassen. Oqaluuserisassaq pingasunngornermi maajip arferngani siullermeerneqassaaq.
Inatsisartut upernaakkut ataatsimiileruttorput ilaatigullu cannabisip inerteqqutaajunnaarnissaanik siunnersuut oqaluuserineqassalluni.
Punkt 119 Inatsisartut upernaakkut ataatsimiinneranni oqaluuserineqassaaq. Oqaluuserisassaq cannabisip inerteqqutaajunnaarnissaanut tunngavoq, siunnersuuteqartuuvorlu Atassutip siulittaasua Aqqalu C. Jerimiassen. Oqaluuserisassaq pingasunngornermi maajip arferngani siullermeerneqassaaq.
Cannabis ullumikkut inerteqqutaavoq, taamaattorli tunisassiat CBD-mik akullit, tassa THC-mik 0,2 procentip tungaanut akoqartut, 2023-mili akuersissuteqarnikkut tuniniarneqarsinnaalerlutik. Tamatuma peqatigisaanik haship akia qaffasissorujussuuvoq - Kristeligt Dagbladimi oqaatigineqartut naapertorlugit grami ataaseq 500 aamma 1.000 koruunit akornanni akeqarpoq.
Nuummiut apeqqummut tamatumunnga qanoq isumaqarpat?
Innuttaasut inatsisissatut siunnersuut pillugu qanoq isumaqarnerat paasiniarlugu, Sermitsiaq Nuummi aqqusinerni isumasiuivoq.
Anngiortumik niuerneq minnerulersissinnaagaa
William Kriegelip cannabis pillugu oqallinneq assigiinngitsorpassuarnik isumaqarfigaa, atuinerullu ilungersunartui aamma maanna inerteqqutaanerata kingunerinik erseqqissaalluni.
William Kriegelip cannabis pillugu apeqqut assigiinngitsunik isumaqarfigaa: Inuttut ataasiakkaatut kiffaanngissuseqarnerup isiginiarnissaa, tamatumunngalu atatillugu peqqissutsimut inuiaqatigiinnullu sunniutaasinnaasut pillugit isumakuluutit oqimaaqatigiissaarpai, oqallinnerlu uppernarsaatinik tunngaveqartariaqartoq isumaqarpoq, isumaliutersuutaannarnik pinnani.
Assi: Hollie Olsen Kielsen
- Apeqqut marloqiusamik isigaara. Illuatungaatigut cannabis piviusumik ajornartorsiutaavoq, atuinerlu arlalippassuartigut atornerluinertut isigisariaqarluni. Cannabis-ip inunnut ataasiakkaanut inuiaqatigiinnullu ilungersunartunik kinguneqarsinnaanera erseqqippoq.
- Illuatungaatigulli inerteqquteqarneq aamma ilungersunartoqarpoq. Anngiortumik niuernerup kingunerisaanik pinerluuteqartartut aqqutigalugit cannabis akisoqisumik tuniniarneqartarpoq, taakkualu ilaat inerteqqutaasumik tuniniaanerminni aningaasarpassuarnik isertitaqartarlutik.
Tamatuma peqatigisaanik oqartussat soorlu politiit, eqqartuussiviit akileraarusersuisullu inatsit atuutsinniarlugu isumalluuterpassuarnik atuisarlutik, tamakkulu tamarmik naggataagut inuiaqatigiinnit akilerneqartarlutik.
Ikiaroornartumik inerteqquteqarunnaarnerup iluaqutaasinnaanera aamma atuinerup allanngorneratigut ernumassutaasinnaasut tikkuarpai.
- Pinerluttuliornerit ikilinerat, assersuutigalugu inatsisitigut malittarisassaqartitsilluni nakkutigineqartumillu tuniniaaneq aqqutigalugu, anngiortumik tuniniaaneq minnerulersinneqarsinnaavoq unioqqutitsillunilu eqqussuinermik annikillisaasinnaalluni. Tamanna eqqartuussiveqarnermi isumalluutinik atuinermik minnerulersitsisinnaavoq, inuiaqatigiinnilu suliassanik allanik salliutitsisoqarsinnaalluni. Taamaattorli tuniniaanermi sakkortuunik malittarisassaqarnissaq pingaaruteqarpoq.
- Peqquserluttuliornertut isigiunnaarneratigut atuinerup annertusinissaa ernumassutigineqartarpoq. Nunanili allani misilittakkat tamakkiisumik taama tikkuussinngillat, soorlumi aamma cannabisip ikiaroorniutinut sakkortunerusunut aqqutaasarneranut takussutissaqanngitsoq.
Kriegel naggataatigut isummerpoq inerteqqutaajunnaarsitsineq nakkutigineqaqqissaartariaqartoq, atornerluinermik annerusumik kinguneqartussaajunnaarlugu.
- Ataatsimut isigalugu isumaqarpunga cannabis inerteqqutaajunnaartariaqartoq, kisiannili nakkutigineqarluni. Taama allannguisoqarneratigut ajornartorsiutip annertusiartuinnarnissaa ilimaginngilara.
Toqqissisimajunnaarsitsissasoq
Anita Phippsip cannabisip inerteqqutaajunnaarsinneqarnissaa eqqarsarnartoqartippaa, aamma tamatumunnga peqatigitillugu oqaatigalugu Nuummi atuineq annertummat, nammineq naliliisinnaanini naapertorlugu inatsisip allanngortinneqarnera toqqissisimajunnaarsitsisinnaassanersoq.
Anita Phippsip cannabisip inerteqqutaajunnaarnissaa eqqarsarnartoqartippaa, ernummatigalugulu toqqissisimajunnaartoqarnissaa, ingammik meeqqat inuusuttuaqqallu akornanni, tassami isumaqarami taakku kingunerluutissanut ajoqutaasunut illersorneqartariaqartut.
Foto: Hollie Olsen Kielsen
- Cannabisip inerteqqutaajunnaarnissaa toqqissisimanartutut isiginngilara. Malunnartumilli Nuummi amerlasuut cannabisimik atuisartut takuneqarsinnaapput. Inerteqqutaajunnaanera toqqissisimajunnaarsitsisinnaassappat inerteqqutaaginnartariaqarpoq.
Pingaartumik meeqqat inuusuttullu, naliliisartut naapertorlugit ’navianartorsiornerpaanut’, qanoq kinguneqarsinnaanera Anita Phippsip ernummatigaa.
- Annerusumik meeqqat inuusuttuaqqallu eqqarsaatigaakka. Tamannami taakkununnga peqqinnanngilaq, ineriartornerannullu eqqarsartaasiannullu sunniuteqarsinnaagami. Inersimasut qanoq sunnerneqartarnersut ilisimanngilara.
Ernummatiginngikkaa
Aqqaluk Nielsenip cannabisip inerteqqutaajunnaarnissaa ajorinngilaa, ilaatigullu tikkuarlugu napparsimasut ilaasa nakorsaatitut pisariaqartissinnaasaraat tamannalu nalilerneqarnerani eqqarsaatigineqartariaqartoq.
Aqqaluk Nielsenip inerteqqutaajunnaarnissaa ajornartorsiutaassangatinngilaa.
Assi: Hollie Olsen Kielsen
- Cannabisip inerteqqutaajunnaarnissaa ajorinngilluinnarpara. Inuit ilaat nappaateqarnertik pissutigalugu cannabisimik pisariaqartitsisarput, taamaammat inerteqqutaajunnaarnissaanut ernumassutissaqanngilanga.
