Danmarkimi kommunit tamarmik illersornissamut qimaaffissiat misissussavaat

Danmarkimi kommuneqarfiit tamarmik aamma upalungaarsimanermut aqutsisoqarfiit maanna Danmarkimi betonimik sanaajusunik illersornissamut qimaaffissiat misissortussanngorpaat.

Inuiaqatigiinnik isumannaallisaanermut aqutsisoqarfik tusagassiorfinnut nalunaarummi taamak ilisimatitsivoq.

Illersornissamut qimaaffissianik betonimik sanaajusunik, innuttaasunit iserfigineqarsinnaajusunik, misissuinerup illersornissamut qimaaffissiat qanoq innerat aamma qanoq annertutigisumik nutarterinermik pisariaqartitsineq pisortanut paasinarsitinneqassaaq.

Misissuineq siulleq, oktobarimiit aallartinneqarsimasoq, kommuneqarfiit aamma upalungaarsimanermut aqutsisoqarfiit arfinillit misissuiffigineqareernerisigut aallartittussanngorpoq.

Taamaalilluni kommuneqarfiit aamma upalungaarsimanermut aqutsisoqarfiit arfinillit misilittagaannik katersisoqarpoq. København, Østjylland aamma Aalborg ilanngullugit matumani pineqarlutik.

Misilittakkat allattorneqarnikuupput aamma ilitsersuutit ilanngunneqarsimallutik. Paasissutissat taakku Kommuneqarfiit Danmarkimi nuna tamakkerlugu misissuinermi atorneqassapput.

- Danmarkimut toqqaannartumik sorsuttoqalersinnaaneranik aarlerisaaruteqartoqanngikkaluartoq, illersornissamut qimaaffissiat qanoq innerat pillugu nutarterinermik paasissutissiisinnaaneq piffissaq eqqorlugu iliuuseqarneruvoq. Taamaattumik misissuineq aallartipparput, Torsten Schack Pedersen (V), isumannaallisaanermut aamma upalungaarsimanermut ministeri, Ritzau-mut oqarpoq.

Angusat digitalimik nalunaaruteqartarfimmi nalunaarsorneqassapput. Taanna januaarip aallartinnerani ammarneqarnissaa pilersaarutaavoq.

Siunertaavoq, misissuinerit kingusinnerpaamik marsip 15-iani naammassineqarsimassasut, taamaalilluni siunissami pilersaarutit pillugit aalajangiisoqarsinnaaniassammat qimaaffissianut betonimik sanaajusunut tunngatillugu.

- Paasissutissanik tunngaveqarluta ilisimasaqalerutta, aalajangiisinnaavugut, tulliani alloriarnissaq qanoq ittuussanersoq. Misissuinermi tamakkiisumik inernerit utaqqivakka, qanoq iliornissatsinnut aalajangersaanissatsinnut atugassarigatsigit. Tamatumunnga tunngavissaq pitsaasuussaaq, tamannalu pissutigalugu misissuinerit tunngavigalugit paasissutissat pissarsiariniarpagut, Schack Pedersen oqarpoq.

Aqutsisoqarfiup nassuerutigaa, suliassaq annertoorujussuusoq. Pingaartumik kommuni betonimik sanaajusunik qimaaffissiarpassuaqarfiusunut tunngatillugu.

Tassunga atatillugu webinarinik arlalinnik pilersaarusiorneqarpoq Danmarkimi kommunit kattuffiat, Kommunernes Landsforening, suleqatigalugu, tassanittaaq kommunit apeqquteqarsinnaallutik ilitsersorneqarsinnaassapput.

Qimaaffissiat betonimik sanaat ilaat ullumikkut kulturimut siunertanut attartortinneqartarput soorlu sungiusartarfittut. Taamaattoqarneratigut suliassaq oqinnerulersinnaavoq, ministeri oqarpoq.

- Amerlasuutigut iluaqutissartaqarpoq, sorsuttoqannginnerata nalaani illersornissamut qimaaffissiat siunertanut allanut atorneqartillugit, taamaalilluni qulakkeerneqarsinnaalluni, qimaaffissiat pitsaassusaat qanoq inissisimasoq paasilertornqarsinnaammat, taanna oqarpoq nangillunilu:

- Inatsisissatut siunnersuuterput, maanna Folketingimi suliarineqartoq, aqqutigalugu periarfissaqalissaagut piareersarnissamik kalerriuteqarsinnaanissatsinnik, tamanna pisariaqalissappat. Maannamut siunertanut allanut qimaaffissiat atorneqartarnerat ajunngilaq.

Misissuinissaq ilutigalugu alloriarneq tulleq piareersarneqarpoq, tassungalu ilanngunneqassapput inissiaqarfiit naqqani qimaaffissiassat (sikringsrum).

Inissiaqarfiit naqqani qimaaffissiassat allaanerussuteqarput qimaaffissianit tamanit tikinneqarsinnaasumi inissisimasunit.