Danmarkip nunallu angisuut arfinillit Kalaallit Nunaat pillugu USA-mut ataatsimoorlutik nalunaaruteqarput
USA-p Nato-mi malittarisassat ataqqisariaqarpai, Nato-mut ilaasortaasut arfineq-marluk Trumpip pilersaarutaa pillugu taama nalunaaruteqarput.
Statsminister Mette Frederiksen (S) Nato-mi nunat allat arfinillit naalakkersuisuisa siuttui peqatigalugit nalunaarusiorpoq, tassani erseqqissarneqarpoq Danmarkip Kalaallit Nunaatalu kisimik Kalaallit Nunaata siunissaa aalajangertassagaat. Tamanna pivoq USA-p præsidentiata Donald Trumpip Kalaallit Nunaannik aqutsinissamik kissaateqarnini uteqattaarereeraalu.
Assi: Charly Triballeau, Michal Cizek/Ritzau Scanpix
Danmarkip Kalaallillu Nunaata kisimik Kalaallit Nunaata siunissaa aalajangiiffigisussaavaat.
Nunat Nato-mi ilaasortaasut arfineq-marluk, ilaatigut Danmark, marlunngornermi ataatsimut nalunaarusiaanni X-mi saqqummiunneqartumi taama allassimavoq.
- Kalaallit Nunaata inuisa kisimik nuna pigisaraat. Danmark Kalaallit Nunaallu kisimik, taakkualu kisimik Danmarkimut Kalaallit Nunaannullu attuumassuteqartunik aalajangiisarput, allassimavoq.
Oqariartuut ukuninnga atsiorneqarpoq; ministeriuneq Mette Frederiksen (S), Tuluit Nunaata ministeriunera Keir Starmer, Frankrigip præsidentia Emmanuel Macron, Tysklandip kanslerianera Friedrich Merz, Italiap ministeriunera Giorgia Meloni, Polenip ministeriunera Donald Tusk Spaniallu ministeriunera Pedro Sanchez.
USA-p præsidentiata Donald Trumpip qanittukkut Kalaallit Nunaat aqussinnaalerusullugu uteqattaarpaa.
Ullualuit matuma siorna præsidenti oqarpoq USA-p "nunap isumannaatsuunissaanut pissutsit eqqarsaatigalugit“ Issittumi, assersuutigalugu Ruslandip Kinallu aamma peqataaffigisaanni, Kalaallit Nunaat pisariaqartikkaa.
Donald Trumpip Kalaallit Nunaannut qaqagu iliuuseqarumaarnerluni oqaaseqarfigiumanngilaa, siusinnerusukkulli taamaaliornissani miserratigisarsimanngilaa.
Qallunaat nalunaaqutaat naapertorlugu marlunngornerup unnuaani, USA-p præsidentiata Donald Trumpip Det Hvide Husimi siunnersortaanera Stephen Miller oqarpoq Kalaallit Nunaata siunissaanik soqutiginninnera erseqqittoq.
- USA Natomi pissaanilissuit annersaraat. USA-p Issittoq isumannaatsuutissaguniuk Natollu soqutigisai illersorniarlugit Kalaallit Nunaat USA-mut ilaasariaqartoq erseqqippoq, marlunngornerup unnuaani Miller CNN-mut oqarpoq.
USA isumaqarpoq Danmark nunat tamalaat akornanni aarlerinartorsiortitsinerit eqqarsaatigalugit Kalaallit Nunaanni isumannaallisaanissamut iliuuseqarpallaarsimanngitsoq.
Donald Trumpip sapaatiummat Danmarkip Kalaallit Nunaata isumannaallisaanermut politikkianik nukittorsaasoqarnera illaruaatigaa oqarlunilu qallunaat issittumi „qimussertartunik allanik“ taamaallaat ilasisimanerarlugit.
Nato-mi naalakkersuisut siuttui arfineq-marluk erseqqissaapput USA-p illersornissamut isumaqatigiissummi nunat 32-t peqataaffigisaanni, aamma USA-mi, malittarisassat iluanniittut maleruartariaqarai.
Naalakkersuisut siuttui eqqaasitsipput Issittumi isumannaatsuuneq attatiinnarneqartariaqartoq, tamannali FN-ip isumaqatigiissutaanut naapertuuttumik pissaaq, ilaatigut nunat ataasiakkaat nammineersinnaanerannut nunallu killeqarfiinut tunngatillugu.
- Taakku najoqqutassiaapput silarsuarmi tamarmi atuuttut, illersortuarumavagullu, naalagaaffiit siuttui nalunaarummi allapput
/ritzau/
