Danmarkip USA Kalaallit Nunaanni sakkutooqarnermi sungiusarnernut qaaqqugaa

Issittumi Sakkutooqarfimmi pisortap generalmajor Søren Andersenip USA Kalaallit Nunaanni sakkutooqarnikkut sungiusarnermut peqataaqqullugu tallimanngornermi qaaqquaa.

Nutaarsiassaqartitsivik Reuters, generalmajorimik qallunaat umiarsuaanni sorsuutimi Nuummiittumi apersuisimasoq, taama allappoq.

Søren Andersen naapertorlugu pilersaarutaavoq ukioq manna kingusinnerusukkut sungiusarnerit ingerlanneqassasut. Tassunga USA-p peqataarusunneranik akissutisinissaq maanna utaqqillugu, taanna oqarpoq.

Nunat Nato-mi ilaasortaasut arlallit sakkutuui Kalaallit Nunaannut ulluni kingullerni tikerarput. Taakku danskit sakkutuuisa "Operation Arctic Endurance"-mi sungiusarnerannut peqataassapput.

Amerikamiut sungiusarnermut tamatumunnga peqataanissamut qaaqquneqarsimanersut ilisimaneqanngilaq.

Illersornissamut ministeriaqarfik aamma kalaallit naalakkersuisui pingasunngornermi nalunaarput Kalaallit Nunaanni eqqaanilu sakkutooqarnerulissasoq.

Natop Issittumi sunniuteqarnerunerata annertusarnissaa siunertaavoq, Europami Atlantikullu illuatungaani isumannaallisaanermut iluaqutaasumik.

Nunat soorlu Norge, Sverige Tysklandilu illersornissamut sakkutuunik nunatsinnut aallartitsipput, USA-lli naalakkersuisuisa Kalaallit Nunaata tigunissaa suli kissaatigaat.

Generalmajor Reutersimut nangilluni oqarpoq Ruslandip Kinallu umiarsuaat Kalaallit Nunaata eqqaani takussaanngitsut.

- Ruslandip Kinallu umiarsuaat Issittup Imartaaniipput, Kalaallit Nunaatali eqqaaniinngillat, Søren Andersen oqarpoq.

Aamma oqarpoq NATO-mi nunat iligiit akornanni saassussisoqarnissaa takorloorsinnaanagu.

USA-p præsidentiata Donald Trumpip nunap isumannaatsuunissaa eqqarsaatigalugu Kalaallit Nunaat aqukkusuppaa, tassanilu Kina Ruslandilu aarlerinartorsiortitsisorai.