Danskeq ikiaroornartulerusutut pineqaatissinneqarsimasoq Kalaallit Nunaanni pineqaatissinneqarusuppoq, eqqartuussivilli naaggaarpoq

Kalaallit Nunaanni eqqartuussaasimagaanni tamanna isumaqanngilaq aamma pineqaatissiissutigineqartoq nunatsinni pillaatisiarineqarsinnaasoq. Tamanna Kalaallit Nunaanni Eqqartuussivimmit naqissuserneqarpoq septembarip 15-iani.

Suliami pineqarpoq angut 45-nik ukiulik danskinit vietnamimiunillu kingoqqisuusoq, taanna Sermersuup Eqqartuussiviani julip 24-iani 2025-mi pineqaatissinneqarpoq ukiuni arfinilinni isertitsivimmiitinneqartussanngorluni.

Atuaruk aamma

Kokainimut tunngatillugu suliaqarnermi unnerluutigineqartut pisuni arlalinni pisuutinneqarput

Suliap ingerlanneqarnera Sermitsiamit malinnaavigaarput allaaserisani arlalinni, allaaserisanilu taakkunani angut S-mik taaguuteqartipparput. Taanna eqqartuunneqarpoq ikiaroornartumik kokain-imik tigummiaqarsimasutut aammalu ikiaroornartumik taassuminnga nunatsinnut eqqussuisimasutut taassumalu saniatigut aamma Nuummi cannabis-imik naatsitseqataasimasutut pineqaatissinneqarluni.

Eqqartuunneqarnermi kingorna S. Nuummi pineqaatissinneqarsimasunut isertitsivimmiit Aasianni pineqaatissinneqarsimasunut isertitsivimmut nuunneqarpoq.

Oktobarimi 2025-mi Pineqaatissinneqarsimasunut Isumaginnittoqarfik aalajangiivoq, taassuma isertitsivimmiittussanngorlugu pillagaanera danskit parnaarussivianut nuutsinneqassasoq.

S. Kalaallit Nunaanniiginnarusukkaluarpoq taamaammallu Inatsisinik atuutsitsinermut Ministeriaqarfimmut naammagittaalliuuteqarpoq. Ministerialli aalajangiineq allanngortikkusunngilaa, tamatumalu malitsigisaanik S. parnaarussivimmut Nyborg Fængsel-imut nuutsinneqarpoq.

Suliaq tunngaviusumik ingerlanneqartoq

Tamanna pereermat nuutsitaareernermi kingorna S. nalinginnaanngitsumik iliuuseqarpoq suliarlu eqqartuussivinnut ingerlatassanngortillugu. Siornatigut taamaattoqarsimaneranik nalaataqartoqarnikuunngimmat aatsaavissuaq aalajangiineq taamaattoq suliassanngortinneqarunarpoq.

Tamatuma malitsigisaanik suliaq kredsret-imiit Kalaallit Nunaanni Eqqartuussivimmut nuutsinneqarpoq, pissutaatinneqarluni suliaq tunngaviusumik ingerlanneqartariaqartoq.

Eqqartuussivimmi S. nassuiaavoq, sooq Kalaallit Nunaannut utertinneqarnissaminik kissaateqarnerluni.

Ajornannginnerusimavoq Kalaallit Nunaanni suliffissamik pissarsinissaq, tassanilu rubin-ilerilluni sulerusukkaluarnerarluni, S.-ip nassuaanera taamaappoq.

Tamatuma saniatigut aamma Danmarkimi misigisarpasssuit pitsaanngitsut nalaassimallugit, taanna oqaluttuarpoq.

Taamaattorli Kalallit Nunaanni Eqqartuussiviit Inatsisinut atuutsitsinermut Ministeriaqarfiup aalajangiussaa atuutissasoq naqissuserpaa septembarip 15-iani. Tamannalu isumaqarpoq S. danskit parnaarussiviani pillagaaqqaannassasoq.

Eqqartuussiviup taamatut aalajangernermini pingaartillugu tunngavilersuutigaa inuk taanna inuunermi annersaani Danmark-imi najugaqarsimasoq, tassanilu anaanaa qitornaalu aamma najugaqarmata. Taanna taamaallaat Kalaallit Nunaanniissimavoq 2022-miit imaluunniit 2023-miit, september 2024-mi ikiaroornartulerilluni pinerluuteqarnini pillugu tigusarineqarnissami tungaanut.

Suliarli suli naammassineqanngilaq, S.-immi Kalaallit Nunaanni Eqqartuussiviup aalajangiinera suliassanngortinnikuuaa.