KL

DK

Danskit partiiata Nunatsinnut timmisartumik angalanerit akikillinissaat kissaatigaa

Innuttaasunut aalajangersimasunut Danmarkip Nunattalu akornanni timmisartumut bilitsinut naalagaaffiup tapiissutai annertusarneqarnissaat, Moderatit kissaatigaat.

Peter Have Folketingimi ilaasortaavoq, Moderaternellu sinnerlugit assartuinermut oqaaseqartartuuvoq.
Morten Okkels
Morten Okkels Morten Okkels Morten Okkels Tusagassiortoq
Saqqummersinneqarpoq

Danmarkip, Savalimmiut Nunattalu akornanni angallannikkut attaveqaatit pitsanngoriartariaqarput, Moderaternes assartuinermut oqaaseqartartuat Peter Have isumaqarpoq.

Atuagalliutipt Fagbladet Luftfartip partiinut assigiinngitsunut silaannakkut angallannermut tunngasunut apeqqutaanut isumaliuutini annippai.

- Tappavunga angalaniarneq akisuvoq, aningaasallu tapiissutigisartakkatta ilaat timmisartumik angalanermut atorneqarsinnaanersut misissortariaqarparput, oqaaseqartartoq oqarpoq.

Peter Havep eqimattat aalajangersimasut, soorlu ilinniartut soraarnerussutisiallillu, aamma qallunaat Kalaallit Nunaanni Savalimmiuniluunniit ilinniagaqarniartut ilisimatusarniartullu, bilitsinik akikinnerusunik neqeroorfigineqarsinnaasut takorloorpaa.

– Naalagaaffeqatigiinneq Kunngeqarfillu sernigisariaqarpavut, aalajangiiniarnitsinnilu Kalaallit Nunaat Savalimmiullu peqataatittariaqarpavut, Peter Have erseqqissaavoq.

Kalaallit Danmarkimi ilinniartut Nunatsinnut angalanerminni ikiorneqarusuttut periarfissaqartinneqareerput. 2025-mi inuit 205-it billitsit siumut utimullu 1.000 koruuninik akeqartut atorpaat.

peter have kalaallit nunaat inuiaqatigiit danmark savalimmiut moderaterne

Atorfiit tamaasa takukkit

PODCASTI

Powered by Labrador CMS