Demokraatit atuartut amerlanerpaamik 18-inngortikkusuppaat – Naalakkersuisut ajoqutaasinnaasut taakkartorpaat

Meeqqat atuarfiat pillugu siunnersuutit arlallit Inatsisartut pingasunngornermi oqaluuserissavaat.

Meeqqat atuarfianni klassimi amerlanerpaamik 18-inik atuartoqarsinnaalissasoq siullersuutigineqartut ilagaat.

Klassimi ataatsimi atuartut amerlavallaartillugit ilinniartitsisut atuartitsinermik naleqqussaanissaminnut, atuartullu ataasiakkaat atuagarsornikkut imaluunniit inooqataanikkut unammillernartitai piffissaagallartillugu paasinissaannut, atuartunullu ataasiakkaanut atassuteqaatinik pilersitsinissaminnut periarfissaat killeqalersartut partii isumaqarpoq.

- Atuartut klassimi amerlassusaasa agguaqatigiissillugu annikillisinneqarnissaat atuartitaanerup qaffasissusaanut tunngassuteqaannanngilaq, aammali meeqqat atuarfiani atugarissaarnerulersitsinissamik suliaqarnermi qitiulluinnartumik sakkussaalluni, partiip gruppia siunnersuummi allapput.

Millionit koruunit ilinniartitsisullu amerlanerusut pisariaqartinneqassasut

Siunnersuut aningaasanik naleqarnera gruppip ilisimavaa, Naalakkersuisullu naatsorsuutit siorna suliarinikuusaat innersuullugit.

Klassimi atuartut agguaqatigiissillugu amerlassusaat nuna tamakkerlugu 18-inut ikilisinneqarpat saniatigut klassit 53-it, ilinniartitsisullu ukiumut sulinerat 68,6-it pisariaqartinneqassasut, naatsorsuinermi paasinarsivoq. Kommunini ukiumut 33,7 mio. koruunit missaat aningaasartuutaanerulissallutik.

Aningaasartuutit eqqaaneqartut Naalakkersuisut akissuteqaamminni Inatsisartut ullumi ataatsimiinnissaat sioqqullugu saqqummiunneqartumi erseqqissaatigaat.

Klassimi ataatsimi meeqqat amerlassusaat atuartitsinermut sunniuteqartarnerat Naalakkersuisut isumaqatigaat, illoqarfiilli pingaarnersaanni ajornartorsiutaassasoq tikkuarlugu. Nunammi immikkoortuisa sinnerini atuarfinni amerlanerpaani klassini atuagaqatigiit 18-ioreerput taakkualuunniit ataallugit amerlassuseqarlutik.

Ilinniartitsisussaaleqineq annertusisinnaasoq

Siunnersuut piviusunngussagaluarpat Nuummi nutaamik atuarfilioqqittoqartariaqassasoq, ilinniartitsisunillu amerlanernik atorfinitsitsisoqassasoq Naalakkersuisut eqqaavaat. Ilinniartitsisussaaleqisoqareerneranullu annertusiissalluni:

- Atuartunut annerpaamik 18-inut appaaniarneq pingaartumik Nuummut sunniuteqassaaq, tassanimi atuarfiit amerlisinneqartariaqassammata, matumani ilaatigut ukioqatigiikkuutaanut marloqiusaasunut nutaanut marlunnut atuarfiliortoqarfiusinnaasumi, Naalakkersuisut akissuteqaammi alapput, nangippullu:

- Tamanna ilinniartitsisunik pisariaqartitsinerulernermik kinguneqassaaq. Ilinniartitsisunik amigaateqarfioreersumi naatsorsuutigineqassaaq taamatut annertusaaneq nunap immikkoortuisa sinnerinit imaluunniit nunanit allanit ilinniartitsisussarsiornermik matussuserneqartariaqassasoq, tamatumalu kingunerisaanik sumiiffinni allani ilinniartitsisussaaleqineq annertunerulissalluni.

Suleqatigiissitaq siunnersuutigineqartoq

Naalakkersuisut siunnersuut naaperiaaffigalugu suleqatigiissitaliortoqassasoq siunnersuutigaat, taakku pisariaqartitsiffiusuni klassit ikilisinneqarnissaannik qulaajaassallutik.

Aamma Demokraatit gruppiata siunnersuutaa alla misissussavaa, tassa 3. aamma 7. klassimi alloriarfinni allattariarsornermi

pinngitsuugassaanngitsunik misilitsissutinik qitiusumit aalajangersarneqartunik atorunnaarsitsinissaq pillugu siunnersuut misissorneqassalluni.

Siunnersuutit taakku marluk Kuno Fenckerip Naleqqameersup siunnersuutaanut ilanngullugu pingasunngornermi oqaluuserineqassapput. Kuno Fenckerip Kalaallit Nunaanni kulturimut inuiaqatigiinnullu pissutsinut naleqqussaasoqarnissaa siunnersuutigaa.