USA
Demokraatit piumasaqarput Trumpip Venezuelamut iliuusai pillugit akissuteqartoqassasoq
USA-p naalakkersuisuisa sakkutuulerluni saassussisoqarnissaa pillugu iliuuseqarneranni Kongressimit akuersissummik qinnuteqartoqarsimannginnera Demokraatit siuttuisa isornartorsiorpaat.
Hakeem Jeffries, Demokratiit USA-mi inatsisartuisa sinniisaasa illuanni ikinnerussuteqartuni siulittaasoq, misigivoq salloqittarneqarluni, Trumpip naalakkersuisuisa arfininngornermi Venezuelami sakkuaattoqarneranut atatillugu.
Asseq (toqqorsivimmit): Chip Somodevilla/Ritzau Scanpix
Demokratiit naalagaaffiup sinniisaasa illuanni sapaammi ataatsimiissapput USA-p sakkutuuisa sapaatip akunnerata naanerani Venezuelami iliuuseqarnerat pillugu.
Taamatut paasissutissiipput aterminnik taasinngitsut ataatsimiinnermili peqataasut CNN-imut Fox News-imullu.
Ataatsimiinneq pisussanngorpoq Præsident Donald Trumpip aqutsisoqarfiata Venezuelap præsidentiata, Nicolas Madurop tigusarineqannginnerani akuersissummik pisinnaatitsissutaasussamik noqqaassuteqarsimannginnera Demokraatit Inatsisartuisa isornartorsiuereersullu.
Demokratiit naalagaaffiup sinniisaasa illuanni ikinnerussuteqartuni siulittaasuat, Hakeem Jeffries, arfininngornermi CNN naapertorlugu nalunaaruteqarpoq, naalagaaffiup ingerlatsinerata periuserisimasaa isornartorsiorneqartariaqartoq.
- Trumpip aqutsisoqarfianit sakkutuut atorneqarnissaat pillugu kongressip akuersissuteqarnissaa noqqaassutigisimanngilaat, aammalu Venezuelami iliuuseqarnissamut kongressi siumoortumik ilisimatitsisoqanngilaq, Hakeem Jeffries allappoq.
- Sumiiffimmi isumannaallisaaneq eqqissisimanerlu siuarsarniarlugit sakkutuut atorneqarnerat kisimi naammanngilaq, Irakimi Afghanistanimilu sakkortuumik misillerfiginikuusarput ilikkarfigisimasariaqarparput.
Taassuma parteeqataa Chuck Schumer, demokratiit ikinnerussuteqartuni siulittaasuat Kongressip aappaani, Senatimi, aamma naalagaaffiup naalakkersuisuinit salloqittarneqarsimasutut misigisimavoq.
Schumer arfininngornermi nalunaaruteqarpoq Trumpip aqutsisoqarfianit pingasoriarluni erseqqissaavigisimagaani Venezuelami sakkutooqarnikkut iliuuseqartoqassanngitsoq imaluunniit naalagaaffiup taassuma aqutsinerata allanngortinneqarnissaa anguniarneqassanngitsoq.
- Amerikamiunut unneqqarissumik iliortoqanngilaq, Schumer isumaqarpoq.
New Jersey-mi naalagaaffimmi demokratit senatoriata, Andy Kim-ip, nunanut allanut ministeri Marco Rubio aamma sorsunnermut ministeri Pete Hegseth Kongressimut salloqittarsimasutut pisuutippai.
- Ministerit Rubio aamma Hegseth sapaatit akunneri marluk matuma siorna senatorit tamaasa isigalugit oqarput, tamanna naalagaaffiup Venezuelap naalakkersorneqarneranut allanngortitsiniarnermut tunngassuteqanngitsoq.
- Taamani upperinngilakka, maannalu takusinnaavarput Kongressimut salloqittarsimasut, Andy Kim arfininngornermi attaveqaqatigiinnermut attaveqaat X-imi allappoq.
CNN naapertorlugu Demokraatit Naalagaaffiit sinnissaasa illuanni, Repræsentanternes Hus-imi, aatsaat marlunngornermi unnukkut ataatsimiissapput.
Sapaammi oqarasuaatikkut ataatsimiinneq nalunaaqutaq 14.00 sumiiffimmi nalunaaqutaa naapertorlugu ingerlanneqassaaq, Fox Newsimut kinaassutsiminik ilisimatitsinngitsoq paasissutissiivoq. Danskit nalunaaqutaat naapertorlugu nalunaaqutaq 20.00, nunattalu nalunaaqutaa naapertorlugu 17:00 ataatsimiinneq pissaaq.
