Donald Trumpip ernera angajulleq Københavnimi takuneqartoq

USA-p præsidentiata Donald Trumpip ernera angajulleq, Donald Trump Jr., sisamanngornermi ualikkut Københavnimi takuneqarpoq.

Ekstra Bladet, Københavnimi Kongens Nytorvimi Hotel d’Angleterrep saavani præsidentip ernerata assinganik pigisaqartoq taama allappoq.

Tassani Donald Trump Jr. Ekstra Bladet naapertorlugu isertortumik paarsisunit avatangerneqarsimasoq takuneqarsinnaavoq.

Assit sisamanngormat nalunaaqutaq pingasunngunngitsiartoq assilisaapput, tusagassiivik allappoq.

Aammattaaq inuit attaveqatigiittarfianni X-imi atuisup videoliaq Donald Trump Jr.-ip Hotel d’Angleterre tunuliaqutarigaa siammartersimavaa. Immiussaq sisamanngornermi nalunaaqutaq 15.40 siammarterneqarsimavoq.

Donald Trump, Jr. suli Danmarkimiinnersoq tallimanngornermi ilisimaneqanngilaq.

Taanna niuernermut atatillugu sivikitsumik tikeraartoq nunanut allanut ministereqarfik DR-imut ilisimatitsivoq.

- Danmarkimit pisortatigoortumik sinniisunik naapitaqanngilaq, Danmarkip nunanut allanut ministereqarfia DR-imut allappoq.

Donald Trump Jr. aatsaat Danmarkimiilinngilaq.

2025-mi januaarip arfineq-aappaanni – Donald Trumpip præsidentitut ivertinneqarnera sioqqutilaarlugu – Donald Trump Jr. politikkikkut suliniuteqartartoq maanna toqukkut qimagutereersoq Charlie Kirk peqatigalugu Kalaallit Nunaannut tikeraarpoq.

Tikeraarnera Donald Trumpip USA-p Kalaallit Nunaat pigilerniaraa arlaleriarluni oqareernerata kingorna pigami tupaallaatigineqarpoq.

Tikeraarnertaaq danskit kalaallillu politikeriisa isornartorsiorpaat.

Præsidentip ernerata Kalaallit Nunaannut tikeraarnermini pisortatigoortumik tikeraarnerunngitsoq, namminerli angalanerusoq podcastimini “Triggered”-imi oqaatigaa.

- Sumiiffiup tupinnangaarnera pissutigalugu inuit naapikkumavagut, taamaammat ornillugit ilassiorniarluta immaqalu videoliorniarluta naatsorsuutigaarput, Donald Trump Jr. Ekstra Bladet naapertorlugu podcastimini oqarpoq.

Sivikitsumik Kalaallit Nunaanniinnerini assit videofilmillu arlallit siammarterneqarput.

Ilaatigut Donald Trump Jr.-ip nasanik Maga-mik (Make America Great Again, aaqq.) allassimasulinnik aappaluttunik Kalaallit Nunaanni inunnut agguaaneranik videoliaq siammarterneqarsimavoq.

Tamatuma kingorna præsidentip ernera tusagassiorfimmit Fox Newsimit apersorneqarluni Kalaallit Nunaannut angalaneq „misigisaq nuannerluinnartoq“ oqarpoq.

/ritzau/