Dronning Margrethe napparsimmavimmi ullut sisamassaat uninngatinneqartoq

Dronning Margrethep siffiaata nalaani aammik annertujaamik katersuuttoqarsimammat Rigshospitalimi ullut sisamassaat uninngatinneqarpoq.

Dronningi suli napparsimmavimmiinnersoq qanorlu innera pillugu sisamanngornermi aperisoqarmat, kunngikkormiut ataasinngormat tusagassiuutitigut nalunaarutaat innersuussutigineqarpoq.

Uninngagaluarluni ajunngitsoq tassani nalunaarutigineqarpoq, aamma "ullullu arlallit" napparsimmavimmiissasoq.

Dronningi tarrarsornerani siffiaata nalaani aak annertujaaq katersuussimasoq paasineqarmat napparsimmavimmut unitsinneqarpoq. Siusinnerusukkut orlunikuuneraniit aak katersuussimavoq.

Taqarsuaatigut ballonilerneqaqqammersoq

Dronningi 86-inik ukiulik Rigshospitalimiit angerlartitaanerminiit sapaatip-akunnera qaangiutinngitsoq unitsitaaqqippoq.

Uummaserimmat unitsinneqarpoq, suliarineqarlunilu uummataata taqarsuaatigut ballonilerneqarluni.

Dronningi napparsimmavimmi uninngatinneqartillugu angerlartinneqarpat, imaluunniit arlaannik nutaarsiassaqarpat nalunaarutigineqartarumaartoq, kunngikkormiut tusagassiuutitigut nalunaarutiginikuuaat.

Aak taqqamiit aniasimatillugu timimi katersuuttarpoq. Annertoqaraangat kapitinnermiluunniit taamatut pisoqarsinnaasarpoq.

Odense Universitetshospitalimi uummatinik, puannik taqqanillu pilattaasarfimmi nakorsaanerup Cengiz Akgülip pingasunngornermi Ritzauimut nassuiaatigaa.

Dronningip qanoq innera oqaaseqarfiginagu, aammik katersuuttoqartarnera kingunerisinnaasaalu tassani oqaluttuarai.

2024-mi 2025-milu napparsimmavimmut aamma unitsinneqartoq

Dronning Margrethe ukiuni 86-ini inuunermini arlaleriarluni Danmarkimi peqqinnissaqarfimmi uninngasarnikuuvoq.

Qanittukkut marloriarluni napparsimmavimmut unitsinneqarnerata saniatigut 2025-mi nuffaseqqanini pissutigalugu napparsimavimmi nakkutigineqarpoq, 2024-milu orlunermi kingorna napparsimavimmi aamma nakkutigineqarluni.

/ritzau/