ILINNIARNEQ
Efterskolemi pisortaq: Inuusuttut ingerlalluarput
Danmarkimi efterskolini sulisut kalaallit atuariartortut nunarsuarmi politikkikkut pissutsit maanna atuuttut pissutigalugit ernumaneri eqqissiviilliornerilu pillugit oqaloqatigisassagaat Danmarkimi efterskolit kattuffiata kajumissaarutigaa. Inuusuttulli ingerlalluartut, siunissamullu ernumaneq pinnani timip ikaarsaarnera initunerusoq efterskolini misigineqarpoq.
Kalaallit inuusuttut 249-it maana Danmarkimi efterskolerput, nunanilu allani pissutsit ilungersunaraluartut amerlasuut atugarissaarput. Taama Galtrupimi, Tjelemimi Halvorsmindemilu Efterskolini pisortat naliliipput. Assimi saamerlermiit tassaapput: Anguteeraq Lundblad, Nûno Runi Larsen, Anders Frederiksen Hansen aamma IIasiaq Skifte, Hjørringimi Halvorsminde Efterskolemi Fri Fagskolemilu atuartut.
Assi: Halvorsminde Efterskole aamma Fri Fagskole
Inuusuttut Kalaallit Nunaanneersut 249-t maannakkut Danmarkimi efterskolerput.
Tamanna pissutigalugu Efterskoleforeningen nunani politikkikkut pissutsit Trumpillu Kalaallit Nunaannik tiguaaniarneranik kinguneqartumik inuusuttut akornanni eqqissiviilliornerit ernumanerlu eqqumaffigineqaqqullugit januaarip qiteqqunnerani efterskolinut tamanut allappoq.
DANMARKIMI EFTERSKOLERNEQ
Kalaallit Danmarkimi efterskoleni atuartut ukiumi atuarfiusumi 2025/26-mi 249-upput.
Siorna 277-it aallartipput. Tassa inuusuttut ukioqatigiit pingajorarterutaasa missaat.
Inuusuttut efterskolinut 89-inut agguataarsimapput.
Galtrup Efterskolemi 54-it, Ærø Efterskolemi (aasaru matusussami) 21-t, Halvorsminde Efterskolemi 14-it, Kildevæld Efterskolemi qulit Tjele Efterskolemilu arfineq-pingasut.
Atuartut sinneri atuarfimmi ataatsimi ataatsimiit arfinilikkaarlutik agguataarsimapput, Efterskoleforeningen allappoq.
Efterskole naleqquttoq nassaariuk
Danmarkimi efterskolit assigiinngitsut maanna 241-pput. Efterskolit amerlanersaat immikkut sammisaqarfiupput, soorlu nipilersorneq, timersorneq inooriaaserluunniit.
Atuartunut immikkut ilinniartinneqarnissaminnik pisariaqartitsisunut, assersuutigalugu naqinnernik ilisarinnissinnaanngitsunut imaluunniit ilikkariartornermik unammillernartitaqartunut immikkut neqeroorutilinnik aamma efterskoleqarpoq. Efterskolit ilaat immikkut ittumik inuunermut isiginnittaaseqarput, soorlu efterskolit kristumiutut inuunermik inunnullu isiginnittaaseqarnermik tunngaveqartut.
Ilaqutariinnut attaveqaataasunut aaqqissuussaq
Danmarkimi efterskoleqarnissamut Namminersorlutik Oqartussanit tapiiffigineqarsinnaassagaanni atuartup attaveqaataasunik ilaqutaqarnissaa piumasaqaataavoq.
Attaveqaataasutut ilaqutaaneq tassaavoq atuartup angajoqqaavisa ilaqutariillu attaveqaataasut akornanni isumaqatigiissut, ilaqutariinnillu attaveqaataasunik tulluartunik nassaarnissaq angajoqqaat namminneq akisussaaffigaat. Assersuutigalugu ilaqutaasut ikinngutaasulluunniit Danmarkimi najugallit attaveqaataasutut ilaqutaasinnaapput.
Ilaqutariit attaveqaataasut atuartoq atuarfiup aallartinnginnerani ukiullu atuarfiusup naanerani atuartoq angerlartinnagu, kiisalu atuanngiffimmi sapaatillu-akunnerisa naanerini ilaanni najugaqartittassagaat naatsorsuutigineqarpoq.
Paasisaqarnerorusukkuit:
www.iserasuaat.gl aamma www.efterskolerne.dk
Atuartut 249-t nuna tamakkerlugu agguataarsimapput. Atuartut Kalaallit Nunaanneersut Morsimi Galtrup Efterskolemi amerlanerpaallutik 54-iupput, tassanilu aamma kalaalimik ilinniartitsisoqarpoq. – Atuartuutigut ullaat tamaasa nutaarsiassanik isiginnaaqatigeriarlugit oqaloqatigisarpagut. Amerlanertigulli Trump sianiitsuunerarlugu qisuariaannartarput. Taamaammat soqutigivallaarneq ajorpaat. Soorunamili pissutsit eqqumaffigaagut, pisortaq Jens Hvid oqarpoq.
Kalaallit Aarhusip eqqaani Tjele Efterskolimi atuartut.
Hormonit siooranissaminngarnit initunerusut
Tjele Efterskole Aarhusip kujasissuaniippoq, pisarnertullu Kalaallit Nunaanneersunik atuartoqartarpoq. Atuartut arfineq-pingasut, løbehjulernermik, mountainbikernermik, eqqumiitsuliornermik nerrivimmilu arsaararnermik sammisaqartut, ukioq manna efterskolerput. Naak pisortap oqarneratut inuusuttut allanik soqutigisaqarnerugaluartut tassani aamma Amerikamiut Kalaallit Nunaannik soqutiginninnerat eqqartorneqartarpoq.
– Hormonit USA-mut ersinermit initunerupput. Taamaammat inuusuttut Kalaallit Nunaanneersut inuusuttunut allanut assingupput. Soorunami nunani allani politikkikkut pissutsit aamma soqutigineqartarput, assersuutigalugu angajoqqaatik oqaloqatigeqqammeraangatigit imaluunniit internetimi inuit attaveqaqatigiittarfiini takusaqarsimagaangamik, pisortaq Jimi Holstebro oqarpoq.
– Ukiorpassuarni Kalaallit Nunaanni sulisimasumik Ilinniartitsisoqarpoq, allalu ukiuni qulini Kalaallit Nunaanni sulinikuusoq aamma ilinniartitsisoq alla affarmik kalaaliuvoq. Arnaa pissutsit atuuttut pillugit inuusuttunik oqaloqateqartittarparput. Taassuma aalajangersimasumik takkuttarami inuusuttut katersuutsillugit ernumassutigisinnaasaat pillugit oqaloqatigisarpai, pisortaq Jimi Holstebro oqarpoq.
- Inuusuttut Kalaallit Nunaanneersut amerlanertigut ingerlalluartut maluginiartarparput
Lise Mikkelsen, Halvorsminde Efterskolemi aamma Fri Fagskolemi pisortap tullia
Inuusuttut ingerlalluartut
Kalaallit inuusuttut 15-it Jyllandip avannaani Hjørringimi Halvorsminde Efterskolemi kiisalu Fri Fagskolemi atuarput. Nukappiaqqat arlallit futsalertartut arlallit nipilersortarlutillu nerisassiornermi atuatarput. Sapaatit akunneri tamaasa kaffillertoqartarpoq, arnarlu kalaaleq tassani najugalik inuusuttut qanoq innerat pillugu oqaloqatiginnittarpoq. Tamannalu iluatsilluarsimavoq, pisortap tullia Lise Mikkelsen oqarpoq.
– Kaagisuullutalu kaffisuutigaluta qanoq innerluta oqaloqatigiissutigisarparput, tassanittaarlu soorunami aamma nunani allani politikkikkut pissutsit pillugit oqaloqatigiissuteqartarpugut. Ilaat inuusuttut allat assigalugit sunnertisimanerupput, isumagineqarpullu.
– Inuusuttulli Kalaallit Nunaanneersut Halvorsmindemi ingerlalluartut nalinginnaasumik maluginiartarparput, aamma siornatigornit amerlanerusunik Kalaallit Nunaanniit atuariartortoqartalermat ukiuni kingullerni taamaappoq. Toqqissisimallutik ataatsimooqatigiittarput, taamaammat aamma inuusuttunik allanik ataatsimooqateqarsinnaapput. Tamatuma saniatigut tamarmik qallunaatut oqallloripput, tamannalu aamma ingerlalluarnissamut pingaaruteqarpoq.
Nukappiararpaaluit Kalaallit Nunaanneersut Halvorsminde Efterskolemi aamma Fri Fagskolemi Futsalimik ilinniarput. Anguteeraq Nûnolu Hjørring Futsal Klub 1. divisionimi unammisartuupput. Nukappiaqqat tamarmittaaq klubbimi sungiusartarput.
Nunarsuarmut allatut isiginnittaaseqalerneq
Lise Mikkelsen naapertorlugu inuusuttut efterskolemi ukioq ataaseq atuarnerminni ataatsimoortutut misigilertarput, tamannalu nunarsuarmut allatut isiginnittaaseqalernissaminnut iluaqutigisarpaat.
– Nutaanik attaveqalertarput, kikkullu tamarmik arlaannik tunniussaqarsinnaanerannik misigisaqassasut neriuppunga. Efterskolemi assigiinngitsorpassuarnik inoqarpoq, inuusuttullu Kalaallit Nunaanninngaanneersut saniatigut aamma Danmarkimit, Tysklandimit Australiamiillu inuusuttut atuartuupput, tamannalu assigiinngissutsip nukittuneranik ersersitsivoq.
