Eqaatsuutitsinerup isumalioqatigiissitaq kimeerukkaa

Danskit/kalaallit namminersorneq pillugu isumalioqatigiissitaata 2008-mi isumaliutissiissutaa kapitalimik Kalaallit Nunaata namminiilivinnissamut aqqutissaani malitassat sukumiisorujussuarmik nassuiarpai. 

– Qulaajaanissamik nutaamik nassaarsiornissaq tunngavissaqanngilaq, namminersornermi pillugu isumalioqatigiissitap erseqqilluinnartumik namminiilivinnissamut suliap ingerlanissaa nassuiareerpaa. Inatsisilerinikkut sinaakkutit erseqqissorujussooreerput. Politikikkut piumassuseq kisimi amigaataavoq, Kuno Fencker Naleqqameersoq Sermitsiamut oqarpoq. 2024-mi Inatsisartut upernaakkut ataatsimiinnerani Kuno Fencker Namminersorneq pillugu inatsimmi § 21-mik atuinnissamik siunertalimmik Naalakkersuisut isumalioqatigiissitamik pilersitsinissaannik peqqusisumik aalajangiiffigisassatut siunnersuuteqarpoq.

Oqallinnermi »§ 21-p atulersinnissaa« kiisalu »§ 21-p aallartinnissaa« oqaatigineqarput, siunertaalli ataasiuvoq. Namminersorneq pillugu inatsimmi § 21, imm. 2-mi nassuiarneqartutut Kalaallit Nunaata namminiilivinnissaata piviusunngortinnissaa pillugu Naalakkersuisut danskit naalakkersuisuinik isumaqatiginninniarnernik aallartitsissapput. Allannguutissatut siunnersuut Inatsiseqarnermut ataatsimiititaliami amerlanerussuteqartunit Siumumeersunit Inuit Ataqatigiinneersunillu saqqummiunneqartoq lloq 28. maj 2024 akuerineqarpoq. Suliassat allat saniatigut allannguutissatut siunnersuutikkut suli Namminersorneq pillugu inatsimmi § 21-p aallartinneqarnissaa pillugu siunertaqartumik isumalioqatigiissitamik pilersitsinissamik Naalakkersuisut peqquneqarput. 

Ulloq 11. oktober 2024-mi naalagaaffinngornissamik naalakkersuisumik Vivian Motzfeldtimik siunnersueqatigiinnermi, § 21-mik isumalioqatigiissitamut suliakkiutip allannguutissatut siunnersuutaaqqaartumit siammasinnerusumik oqaasertalernissaa Inatsiseqarnermut ataatsimiititaliami ilaasortat kaammattuutigaat. Tamatuma isumalioqatigiissitap nammineerluni misissueqqissaarnissamik misissuinernillu ingerlatsisinnaanermut naammattumik eqaassuseqarnissaa qulakkiissavaa. Marsip aqqarnani Inatsisartunut qinersinerup kingorna Demokraatit, Inuit Ataqatigiit, Siumut Atassullu sisamaallutik naalakkersuisunik pilersitsipput, § 21-millu isumalioqatigiissitaq naalakkersuisooqatigiinnermut isumaqatigiissummi ilaavoq: 

– § 21-mik isumalioqatigiissitap nanginneqarnissaa suliaminillu naammassinninnissaa naalakkersuisooqatigiit qulakkiissavaat. Neriorsuut tamanna maanna naammassineqarpoq; Kuno Fenckerilli 2024-mi Upernaakkut ataatsimiinnermi siunnersuutigisani ilisarisinnaanngilaa.

 Inatsisilerineq aallunneqartoq 

Naalakkersuisut § 21-mut isumalioqatigiissitamut suliakkiut 2024-mi upernaakkut ataatsimiinnermut oqallisigineqaqqaartumut sanilliullugu eqaannerusoq akueraat.

Maanna isumalioqatigiissitaq § 21-mik atulersitsisinnaajunnaarpoq, inatsisilerinerpiakkulli innuttaasut taasitinneqarnissaannut tunngavissat tunngaviusumillu inatsisissatut siunnersuummik atuinikkut § 21-mik atulersitsinermik suliaqarneq qulaajassallugu. Isumalioqatigiissitaq eqaatsuunermigut ukiup aggersup ingerlanerani suliassanik allanik naapertuussorisaminik misissuinissamut nammineerluni aalajangiisinnaavoq. 

Naallu Kalaallit Nunaata namminersortup aningaasaqarneranik naliliineq suliamut ilanngikkaluartoq, isumalioqatigiissitap nammineerluni nunasiaatillit nunasiallu allat namminiilivinnerup kingorna aningaasaqarnikkut attaveqarnerata qanoq pilersinneqarsimanera misissorsinnaavaa. Naleqqap paasinninnera malillugu suliakkiut 2024-mi upernaakkut aalajangernermi politikikkut anguniarneqartunik naammassinninngilaq. Isumalioqatigiissitamik § 21-mik atulersitsisinnaasumik taarsiullugu aaqqissuussamik namminiilivikkiartornerup allaffissornikkut nakkutigineqartumik pinissaanik aaqqissuussamik pilersitsisoqarpoq. 

– Isumalioqatigiissitaq kinguarsaasutut § 21-p siunertarpiaanit allamut sangutitsisutut ilusilerneqarpoq. 2 million koruunit § 21-mik atulersitsivinnikkut Kalaallit Nunaata namminersortunngornissaa pillugu danskit naalakkersuisuinik isumaqatiginninniartussanik sanarfinermut atorneqartariaqaraluarput, Kuno Fencker oqarpoq.