Eqalugaq silap pissusiata allanngoriartornera pissutigalugu avannarpartertoq
Eqalukkat avannarparteriartorput, tamannalu imaani nerisaqaqatigiinnut annertuumik sunniuteqassaaq. Tamanna silap pissusiata allanngoriartorneranik pissuteqartoq, Pinngortitaleriffiup misissuinerata nutaap takutippaa.
Eqalukkat malunnaatilimmik unammillerneqangaatsiarput. Pinngortitaleriffimmi misissuinerup nutaap takutippaa issittup imartaa silap pissusiata allanngoriartornera pissutigalugu unammillerneqartoq. Saarullik (Gadus morhua) uani assimi takuneqarsinnaavoq, eqalugaanngitsoq (Boreogadus saida).
Toqqorsivimmit assi: Leiff Josefsen
Eqalukkat 1990-ikkunniilli ikiliartornerat avannamullu saqiartulersimanerat Pinngortitaleriffimmi ilisimatusartut uppernarsarsinnaavaat, nerisassanillu pilersuinermi pingaarutilimmik inissisimaffeqarmata tamanna imaani nerisaqatigiiaanut annertuumik sunniuteqarpoq.
-ITaamaattumik eqalugaqassusiata annertussusaa siaruaassimassusaallu aalisakkanut puisinullumi annertuumik sunniuteqartussaassaaq – taamaalillutillu aamma inuit piniagaannut aalisarsinnaasaannullu sunniuteqartussaassalluni, Pinngortitaleriffimmit tusagassiuutitigut nalunaarummi ilisimatitsissutigineqarpoq.
Tupaallannartoq
- Allannguutit sukkasoorujussuarmik pisimapput, uumassuseqaleqqaartartullu uumaniarnerisa ilungersunarsisimanerinik aallaaveqarsimassangatitsisoqarpoq, assersuutigalugu immap qaavata kissarnerulersimanerata kingunerisaanik aammalu immap sikuata siaruaassimanerata annikillineranik aammalumi uumasuaraaqqat tappiorannartut suussusaat allannguuteqarsimanerinik aallaaveqassangatinneqarami.
Eqalukkat kujataani ikiliartortillugit pisat pillugit paasissutissat puisit, eqalukkanik pingaarnertut inuussuteqartut, avannarpartersimanerat takutippaat.
- Uumassuseqarnerit ataqatigiinneri tamarmik silap allannguuteqarnerata kingunerisaanik sunnerneqarsimasut ersersinneqarpoq. Allat patsisaasinnaasut soorlu qaasuttunik nerineqarnerujussuat imaluunniit inuussutissarsiutitigut aalisartoqarnerujussua aamma misissuiffigineqarput, silalli allanngornerata sunniutai patsisaanerpaajusut annertunerpaajusullu eqalugaqarneranut siaruaassimanerannullu tunngatillugu paasineqarpoq.
Atuagassiami saqqummersinneqartoq
Misissuineq atuagassiami tusaamasaalluartumi Arctic Science-mi saqqummersinneqaqqammerpoq, Pinngortitaleriffimmilu ilisimatusartut misissuinermik siuttuupput. Misissuineq tamarmi professorimit Teunis Jansenimit Aalisarnermut Uumassusillinullu immikkoortortaqarfimmeersumit siuttuuffigineqartoq uani (tuluttut) atuarneqarsinnaavoq.
