Eqqiaasut soraarsitaanerat pillugu tusatsiakkat: Naalakkersuisoq susoqarneranik nassuiaaqqusisoq
Anna Wangenheim peqqinnissaqarfimmik aqutsisunut nassuiaasoqarnissaanik qinnuiginnippoq, eqqiaasut soraarsinneqarsimasut nunanilu allaneersunik sulisoqartitsilernermik taarserneqassasut pillugit pasilliutit pillugit.
- Malitassat malinneqarnissaat soorunami naatsorsuutigillugulu piumasarissavara, Anna Wangenheim Facebookimi allappoq.
Assi: Oscar Scott Carl
Nuummi Dronning Ingridip Napparsimmavissuani eqqiaasut kalaallit soraarseriarlugit nunaniit allaneersunit taarserneqarnissaat pillugu oqaluttuat inuit attaveqaqatigiittarfiisigut maanna siammarterneqarput.
Siumup siulittaasua Aleqa Hammond immiussaminik siammarterilluni Facebookimi oqallinneq akuliuffigaa, pisullu ilumuussappata quarsaarnarnerarlugit.
Peqqissutsimut inunnullu innarluutilinnut naalakkersuisoq Anna Wangenheim (D) oqallinnermut maann aamma ilannguppoq.
Suliaq pillugu pisortatigoortumik saaffigineqarsimanani oqarpoq, oqallinnerli aamma arajutsisimannginnerarlugu.
- Naqissuseqqaarlara Naalakkersuisut sinnerlugittaaq, nunaqavissut sulilluartut ineriartortitsinissamut isiginnaartuuinnassanngimmata. Taamaattumik politikererinngilarput sulisinnaasunik sulisinnaajunnaarsaanissaq, killormuuanik inerisaaqataanissamut akisussaaqataatinneqarnissaat pisariaqarpoq, Anna Wangenheim allappoq.
Anna Wangenheimip paasinninneq naatsorsuutigaa
Peqqissutsimut naalakkersuisup (Dronning Ingridip Napparsimmavissuani) qullersat pisut siammarterneqartut pillugit nassuiaateqaqqusimallugit aamma paasissutissiissutigaa.
- Naalakkersuisutut ilisimanngilara, tusarsimanngilara aammalu akulerusimaffiginngilakka atorfinitsitsisarnerit soraarsitsinerillu, taamaattumik piviusup sammivigisinnaasaai paasiniarpara takusinnaagakku politikkikkut fb aqqutigalugu sammineqalersoq. Naatsorsuutigilluinnarpara suususersisoqassasoq.
- Aamma malitassat malinneqarnissaat soorunami naatsorsuutigillugulu piumasarissavara, Anna Wangenheim allappoq.
Peqqinnissaqarfimmi eqqiaanerup pitsaanerulernissaanik kissaateqartoqarnera paasisimallugu aamma oqarpoq.
Anna Wangeheim Sermitsiamit oqaaseqartinniaraluarparput. Peqqinnissaqarfiup nassuiaateqarnera pissarsiaritinnagu oqaaseqarsinnaanani oqarpoq. Peqqinnissaqarfimmut saaffiginneqqusivoq.
