Erika Baadh Nielsen Folketingimut qinigassanngortippoq
Erika Baadh Nielsen: - Pinngortitap pisuussutai avammut tunisassiarinerisigut nuna tamakkerlugu ineriartortitsissaagut.
Folketingimut qinigassanngortittup nunatta inuussutissanik tunisassiornera nukittorsarniarpaa, naasut immallu naasui avammut tuniniarneqarnissaannut nunamilu suliffissaqartitsinissamut atorluaanissaq nukittorsarusuppaa.
Assi: Nammineq pigisaq
Folketingimut qinersisoqartoqarnissaanik nalunaartoqanngitsiarnerani Siumut folketingimut marsip 24-ani qinersinissamut qinigassanngortitaminik aammarluni nalunaaruteqarpoq.
Taanna tassaavoq Erika Baahd Nielsen 58-nik ukiulik, atuagaatilerisutut ilinniarsimasoq, aammalu inuiiat kulturiat oqaluttuaarisaanerallu Ilisimatusarfimmi kandidatitut ilinniarsimasuulluni, taakkualu saniatigut nerisassanik siunnersuisartutut ilinniarsimalluni.
Inuussutissat nunallu tamalaat soqutiginninnerat
Qineqqusaarnermini oqariartuutigai Kalaallit Nunaata pinngortitami pisuussutai avammut niuerutigineqarsinnaanngortinneqassasut nuna tamakkerlugu suliffissaqartitsiniarneq eqqarsaatigalugu. Inuussutissanut oqartussaaffik Danmarkimit Kalaallit Nunaannut aamma nuunneqartariaqarsoraa, malittarisassat tunisassiornermut akornutaanngitsut tapersersuinissaat anguniarlugu, Issittumillu soqutiginninneq nunanit tamalaanit atorluarneqartariaqartoq umiarsualiviit nutarternissaannut imminullu pilersornerup qulakkeernissaanut.
- Nunatsinni
inuussutissarsiutinik pilersitsinissamut oqartussaaffik aporfiussappat
nunatta inoriartortinneranut kingaallersaataajuaanassaaq. Isorliunerusut
nunaqarfiillu uummaarissaqqinnissaanut pingaarpoq tunisassiorsinnaanissaq
avatangiisit atorluarlugit piorsarnissaa.
- Fødevarestyrelse
oqartussaaffiit amerlanerusut nunatsinnut nuussinnaanerat imaluunniit
nunatsinnut naleqqussarneqarnissaa Folketingimi suliassatut pingaartutut
pimooruttariaqartutullu isigaara, Erika Baadh Nielsen, ilaatigut tusagassiorfinnut nalunaarummini taama allappoq.
