EU-mi aallartitat Kalaallit Nunaat pillugu piaartumik ataatsimiigiaqquneqarput

EU-mi aallartitat Kalaallit Nunaat USA-llu præsidentiata Donald Trumpip akitsuutinik qaffaanissamik siorasaarinera pillugit Bruxellesimi sapaammi ataatsimiittussanngorput.

Cypernip, EU-mi siulittaasuuffimmik tigumminnittup, nutaarsiassaqartitsivik Reuters naapertorlugu arfininngornermi unnukkut tamanna nalunaarutigaa.

Trumpip Danmark nunallu allat arfineq-marluk februaarip aallaqqaataaniit 10 procentimik akitsuuserniarlugit nalunaarutiginerata kingorna ataatsimiittoqartussanngorpoq. USA-p akitsuusiinini unitsissanerarpaa, USA Danmarkilu Kalaallit Nunaat pillugu isumaqatigiissuteqarsinnaappata.

Taama nalunaaruteqarneq akissuteqarfigissallugu Europami nunat ataqatigiissaarilerput.

Nutaarsiassaqartitsivik Reuters naapertorlugu EU-mi aallartitat oqarput ataatsimiinneq nalunaaqutaq 17.00 aallartissasoq.

Danmarkip Europamilu nunat Trumpip nalunaarutaa ataatsimoorlutik assuaraat.

- Akitsuutit Atlantikup illuatungaani attaveqaqatigiinnermut ajoqutaasinnaapput, ajornerulersitserujussuarsinnaallutillu, EU-mi kommissionip siulittaasua Ursula von der Leyen X-imi allappoq.

- Europa ataatsimuuginnassaaq, ataqatigiissaariuaannassaaq namminerlu oqartussaassutsiminik aalajangersimalluinnarluni.

Kalaallit Nunaanni Danmarkimilu inuit tusintilikkuutaat arfininngornermi akerliussutsimik takutitsipput Trumpip arlaleriarluni oqaatigisartagai akerlilerlugit, tassa Kalaallit Nunaata aqunneqarnissaanik pigilerneqarnissaanillu kissaateqarneranut.

Danmark Kalaallit Nunaat pillugu USA-mik sapaatip akunnerata ingerlanerani oqaloqateqarnerulerniarsarisimavoq, ilaatigut nunanut allanut ministerit Washington D.C.-mi ataatsimeeqatiginerisigut.

Tamatuma saniatigut Danmarkip nunanit arlalinnit tapersersorneqarluni sakkutooqarnikkut sungiusarnermi nunatsinni ingerlatsisoqarpoq, sakkutooqarnerlu annertusarlugu.

Taama iliorneq Trumpimit isornartorsiorneqangaatsiarpoq, taannami Truth Socialimi nalunaarpoq Danmarkimut, Norgemut, Sverigemut, Frankrigimut, Tysklandimut, Tuluit Nunaannut, Hollandimut Finlandimullu akitsuusiiniarluni.

- Taama iliorneq nunarsuarmut sillimaniarnikkut ulorianartorsiortitsivoq. Nunat taakkua, ulorianartumik iliuuseqartut aarlerinartorsiortitsinerulerput, Trump allappoq.