EU-p Ukraine ilaasortanngornissaanut isumaqatiginninnarnermik nutaamik ammaassisoq

Ukraine EU-mut ilaasortanngorniarluni marlunngornermi alloriaateqaqqippoq.

Bruxellesimi naalakkersuisut ataatsimeersuarnerisa pingajuanni Ukrainep EU-mut ilaasortanngorniarluni isumaqatiginninniarfissani alla aallartippaa.

Taamaalilluni Ukrainep isumaqatiginninniutigineqartussani arfiniliusuni aappaat maanna aallartippaat.

Irlandimi Europamut tunngasunut ministeri Thomas Byrne, taama oqarpoq.

- Tamanna EU-p Ukraine EU-mut ilaasortanngortitsinissaanut piumassuseqarneranut, Ukrainellu EU-mut aqqummik ingerlarusunneranut uppernarsaataavoq, Thomas Byrne oqarpoq.

Isumaqatiginninniutigineqartussat tulleriiaarneqarneq ajorput. Taamaammat isumaqatiginninniutigineqartussat allattorsimaffianni arfernat, nunanut allanut politikki, illersornissamullu tunngasut marlunngornermi isumaqatiginninniutigalugu aallartinneqarpoq.

Moldova aamma isumaqatiginninniutigineqartussat allattorsimaffianni arfernat marlunngornermi immikkut ittumik ataatsimiissutigineqassaaq, EU-p allilerneqarnissaanik kommissæria, Marta Kos oqarpoq

- Nunanut allanut tunngasunut illersornissamullu suleqatigiinnermut tunngasoq, Ukrainep Moldovallu isumaqatiginninniutigineqartussat allattorsimaffianni arfernat aallartissavaat.

- Nunat taakku marluk Europami isumannaallisaanermut tapersersuisinnaapput, Marta Kos oqarpoq.

Nunap naammattumik aaqqissuusseqqissimanera pissutigalugu EU-mi kommissioni siusinnerusukkut naliliisimanera aallaavigalugu, Ukraine neriuuteqarsimagaluarpoq isumaqatiginninniutigineqartussat arfiniliusut tamaasa ataatsikkut ingerlatissallugit.

Martha Kosip tusagassiortunik katersortitsinermi erseqqissarpaa isumaqatiginninniuteqartussat kingulliit sisamat “sapinngisamik piaarnerpaamik” ingerlanneqartariaqartut.

- Ukraine piareersimavoq, piumasaqaatit tamaasa naammassisimavai, Marta Kos oqarpoq.

Ukrainemi ministeriunerup tulliata, Taras Kachkap, aalajangerneq "nutaarsiassaq Ukrainemut nuannersuusoq“ marlunngornermi oqaatigaa, Kachkammi oqarneratut tamanna sumiiffiit sinnerisa ammarnissaannut akornutaasinnaasunik takussutissaqanngilaq.

- Isumaqatiginninniutigineqartussamik aallartitsiniarluta juulip qiteqqunnerani maaniippugut, tamatumalu takutippaa qaqugukkulluunniit siuariartoqarsinnaasoq.

- Isumaqatiginninniarnissanut akornusersuisoqarunnaarpoq, Tara Kachkap oqarpoq.

Ungarnip ministeriunerata Viktor Orbánip Ukrainep isumaqatiginninniarfissaq siulleq aallartinnissaanut akornusersuiuarsimavoq.

Orbánip apriilimi Ungarnimi inatsisartunut qinersinermi ajorsarnerata kingorna ministeriuneq nutaaq, Péter Magyar, Ukrainemut ajunnginnerusumik isiginnittaaseqalersimavoq.

Ungarnilli isumaqatiginninniarnerit tamaasa ataatsikkut ingerlanneqarnissaat suli kissaatiginngilaa.

Magyarili maannamut Ukrainep isumaqatiginninniarnissanut periarfissat allat unitsissanerai suli erseqqissumik nalunaarutiginngilai.

- Uagutsinnut pingaarnerpaaq tassaavoq kinguartinneqarsinnaasunik kingusinnerusumulluunniit kinguartissinnaasunik aalajangiisoqartarnissaa.

- Irlandip EU-mi siulittaasuuffimminik tigusinissaminut iliuuseqarnera maanna isumalluutigaarput, isumaqatigiinniarnerillu tulliuttut ingerlanneqarnissaat qilanaaraarput.

EU-p Montenegro Albanialu naalakkersuisui marlunngornermi ataatsimeeqatigissavai.

Martha Kos naapertorlugu nunat taakku marluk isumaqatiginninniutigineqartuni arfinilinni immikkoortut 35-t ilaat naammassisinnaavaat.

Tamatumani erseqqissarneqarpoq nunat taakku marluk maanna EU-mut ilaasortanngornissamut pimoorussillutik ingerlasut.

- Montenegro siuarsimanerpaavoq, immikkoortut marluk ullumikkut naammassineqassapput, taamaalilluni immikkoortut 18-it naammassineqarput.

- Taamaasilluni Montenegrop isumaqatiginninniarnermi immikkoortut affaat sinnerlugit naammassereersimalerpai, Marta Kos oqarpoq.

Montenegrop anguniagaraa immikkoortut sinneri ukioq manna naammassissallugit, taamaalilluni 2027-mi EU-mut ilaasortanngorniarluni qinnuteqaat nunanit EU-mut ilaasortaasunit Europallu inatsisartuinit inaarutaasumik akuerineqarsinnaalissallutik.

Tamanna iluatsissappat, Montenegro 2028-mi EU-mut ilaasortat 28-ssaattut ilanngussinnaassaaq.

RITZAU