Filippinerini nunap sajorujussuarnerani inuit ikinnerpaamik 15-it ajunaarput
Filippinerini nunap sajunnerata kingunerisaanik videoliarineqartuni illut uppikaasimasut takuneqarsinnaapput, ikinnerpaamillu inuit 15-nit ajunaarput.
Filippinerini nunap sajunnerata kingorna neriniartarfik nakkaasimavoq.
Assi: Edwin Espejo/Reuters
Filippinerit qeqertaasa annersaata aappaanni Mindanaomi nunap sajorujussuarnerani inuit ikinnerpaamik 15-it ajunaarput.
Filippinerini ajunaarnersuaqartillugu iliuuseqarnermut ataatsimiititaliaq, taamatut nalunaaruteqarpoq.
Taakkua ilaat aqqaneq-marluk Soccsksargeniminngaanneerput, Mindanaomi illoqarfimmit General Santosimit ungasinngitsumiittumi.
Aammattaaq nunap immikkoortuani Davao Occidentalimi inuit pingasut ajunaarput.
Tassa toqusut tamarmik qeqertami Mindanaomeersuupput.
Politiit pisortaanerat Roland Catoburan naapertorlugu inuit marluk, Alabelimi General Santosip eqqaani ittumi iikkap uppinnerani nanerneqartut, ajunaartut nalunaarsorneqarneranni ilanngunneqanngillat
Nunap sajunnera Richterip uuttuutaani 7,8-mik sakkortussuseqarpoq.
Nunap sajunnera siulleq arlaleriarluni kingumut sajuttarpoq, sakkortunerpaartaalu USGS-ip uuttuutaa naapertorlugu 6,5-imik sakkortussusilimmiippoq.
Videoliani inuit nittartakkatigut attaveqaqatigiittarfiini takuneqarsinnaasuni AFP-mit uppernarsarneqartuni, ilaatigut takuneqarsinnaavoq pisiniarfissuaq Jollibees-imik neriniartarfilik nakkaassimasoq.
Videoliami allami atuarfik, pisortat naapertorlugit atorneqanngitsoq, nakkaassimasoq takuneqarsinnaavoq.
- Uummaa ilaa! atuarfik nakkaativissimavoq, videoliani ilaatigut taama nilliasoqarpoq.
Videoliami allami meeqqat atuarfianni atuartut nunap sajunneranit natermut uppitinneqartillutik, ilinniartitsisuminnik pakkussillutik nilliasut takuneqarsinnaavoq.
Filippinerini præsidentip Ferdinand Marcosip ulloq atuarfik qeqertami Mindanaomi sumiiffinni eqqugaasuni taamaatippaa, meeqqanut ulloq taanna atualeqqaarfiusussaagaluarpoq.
Nunap oqartussaasuisa nalunaarutaat naapertorlugit atuarfiit 6000-t missaat nunap sajunneranit eqqugaasimasut, Filippinerini suliniaqatigiiffik Red Barnet nalunaarpoq.
- Ajunaarnerup qanoq annertutiginera suli ilisimaneqanngilaq, innuttaasulli nalunaarput nunap sajunnerani init atuartitsiviusut atuarfiillu aserorneqarsimasut, qeqertarlu tamakkerlugu atuartut immikkoortortaqarfii matusariaqarsimallutik, Faisah Ali, Filippinerini Red Barnet-mi pisortaq oqarpoq.
Filippinerit præsidentiata inuit qutsinnerusunut qimagussornissaannik kajumissaarpai.
Oqartussaasut naapertorlugit General Santosimi mittarfik matugallarneqarpoq.
Filippinerini, Manerassuarmi nunap sajunneranit sunnerneqartartumi, ullut tamangajaasa nuna sajuttarpoq, taanna "Ring of Fire"-mik ilisimaneqarpoq - kalaallisut; innerup nigaliliaa.
/ritzau/AFP
