COP30
FN: Silap pissusianik pissutilimmik ajunaarnersuit ukiuni qulikkaani inuit 250 millionit qimaatippaat
Brasilienimi silap pissusianut ataatsimeersuarnissaq sioqqullugu UNHCR-ip silap pissusianut tunngatillugu ajornartorsiutip kingunerisai pillugit nalunaarusiaq nutaaq saqqummiuppaa.
Filippo Grandi, FN-ip qimaasunut qullersaqarfiani pisortaaneq, COP30-mi silap pissusianut ataatsimeersuarnissaq sioqqullugu iliuuseqarnissamik kaammattuivoq.
(Asseq toqqorsivimmit) - Assiliisoq: Salvatore Di Nolfi/Ritzau Scanpix
Inuit 250 millionit nunagisaminni najugaqarsinnaajunnaarlutik nuussimapput silap pissusianut attuumassuteqartunik ajunaarnersuaqarneratigut ukiut qulikkaat ingerlaneranni.
Taama nalunaaruteqarpoq FN-ip qimaasunut kattuffia, UNHCR, nutaamik nalunaarusiorsimasoq COP30 sioqqullugu, Brasilienimi ataasinngornermi aallartittussami, nutaarsiassaqartitsivik AFP allappoq.
Tamanna isumaqarpoq, agguaqatigiissillugu inuit 67.000-it sinnerlugit ullormut nuuttariaqartarsimasut ukiut kingulliit qulit ingerlaneranni, UNHCR nalunaarpoq .
Qarsutsinersuit, anorersuit, nunap panernersui kiannerujussullu tassaapput silap pissusianut attuumassuteqartunik ajunaarnersuarnut pissutaasut, inuillu qimaallutik aallartarnerannut pissutaasut. Inuppassuit ajunaarnersuarnut silap pissusianut attuumassuteqartunut qimaallutik aallarsimapput, taama nalunaarpoq FN.
FN-ip qimaasunut qullersaata, Filippo Grandi, COP30-mi nunarsuarmi aqutsisunut kaammattuivoq pisariaqartitsinerpaat ikiorneqartariaqartut, AFP allappoq.
- Qimarngusunik amerlanerusunik pinaveersaartitsiniaraanni silap pissusianut aningaasaliissutit inuiaqatigiinnut qajannartumik inissisimasunut. COP30-mi ataatsimeersuarnerup malitsigisaanik iliuuseqartoqartariaqarpoq - neriorsuutinik imaqanngitsunik tunniussisoqarani, Filippo Grandi oqarpoq.
UNHCR naapertorlugu sumiiffiit ullumikkut nunarsuarmi qimaasut affaasa missaat najugaqarfigisaat ukiuni 15-ini tulliuttuni silap pissusianut attuumassuteqartunik ajunaarnersuarnut navianartorsiortinneqarsinnaapput.
2025-ip qiteqqunnerani inuit 117 millionit sorsunnernik, pinerlunnernik malersorneqarnermillu peqquteqartumik qimaatinneqarsimasut, UNHCR nalunaarpoq AFP naapertorlugu.
- Silapiluk angerlarsimaffinnik inuussutissanillu aserorterivoq ilaqutariillu allatut iliorsinnaajunnaartitaasut qimaatillugit - amerlasuut pinerluttunit sorsunnerniillu siornatigut qimaasimasut - taamaalillutik qimaateqqinneqarput, Filippo Grandi oqarpoq.
- Inuppassuit taakku annertuumik annaasaqareersimapput, maannakkullu aamma eqqorneqarlutik. Taakku ilagaat sakkortuumik panernersuaqarnernit, qarsutsinersuarnit toqumik nassatalinnit, kiarujussuarneranillu eqqorneqartut, kisianni aamma taakkuupput periarfissalunnerpaat, Filippo Grandi nangippoq.
UNHCR nalunaarpoq, nunarsuarmi qimaasunut sumiiffissiat kiassuarmik nalaataqartut 15-it - Gambia, Eritrea, Etiopien, Senegal aamma Mali - 2050-ip tungaanut ukiup ingerlanerani ullut 200-t missaani kiarujussuarsiornermik nalaataqartussat.
- Sumiiffiit pineqartut akornanni amerlasuut inuerukkiartortussaasut ilimanarpoq kiarujussuarneq anorersuarsuillu pissutigalugit, UNHCR-ip nalunaarusiaani AFP naapertorlugu oqaatigineqarpoq.
COP30 Brasilienimi novembarip 10.-21. ingerlanneqassaaq.
