Folketingimi ilaasortaq iliuuseqarnissamut kajumissaaruteqarpoq: Trump ingasattajaarlunilu tusarusunngilaq
Trump diplomatit oqariartuutaannut tusarnaarneq ajorpoq, taamaammallu Kalaallit Nunaata Danmark suleqatigalugu Donald Trumpimut oqaasitsini aalajangersimasumik iliuuseqarfigisariaqalerpai, Aaja Chemnitz (IA) isumaqarpoq. Taassumattaaq Donald Trump russit Kinamiullu umiarsuaat nunatta imartaanni sumi tamaaniittut oqarami ingasattajaarlunilu uukapaatitsiniaasoq aamma oqaatigaa.
- Uannit IA-miillu oqariartuut tamatigut taannaajuassaaq: Kalaallit Nunaat tuniniagaananilu tuniniagaanngisaannassaaq, taamaammat Kalaallit Nunaata USA-mut ilanngunnissaanik pilersaarutit puigorneqarniarlik, Aaja Chemnitz oqarpoq.
Toqqorsivimmiit assi: Leiff Josefsen
Folketingimut ilaasortap Aaja Chemnitzip (IA) Donald Trumpip Kalaallit Nunaat pillugu oqaaseqaatai kingulliit tunngavigalugit Kalaallit Nunaata upalungaarsimanissaanut illersornissaanullu tunngatillugu Kalaallit Nunaat Danmarkilu iliuuseqaqqullugit maanna kajumissaarpai.
- Sakkussarpassuaqarluta ataaseq kisiat, tassalu diplomatii politikkikkullu oqariartuutit USA-mut oqaatsikkut ingerlateqqitarput, atoripput isumaqarpunga, Aaja Chemnitz oqarpoq.
Trumpip mianersoqqussutit tusaanngikkai maannakkut erseqqissilluinnartoq isumaqarpoq:
- Pissutsit maanna atukkavut erseqqinnerujartuinnarput, USA-lli præsidentia tusarnaanngitsoq ersarippoq, Aaja Chemnitz oqarpoq.
- Pilersaarusiortariaqarpugut
Kalaallit Nunaanni toqqissisimalernissaq anguniarlugu Danmarkip Kalaallillu Nunaatalu akornanni oqaloqatigiinneq qaninnerulertariaqarlunilu erseqqinnerulertariaqartoq taanna oqarpoq.
- Ajornerpaamik pisoqassagaluarpat qanoq iliorniarluta ataatsimut pilersaarusiortariaqarpugut.
- Ullumikkut upalungaarsimanitsinniit pitsaanerusumik upalungaarsimanissarput Danmarkimillu oqaloqateqarluarnerunissarput pingaaruteqarpoq, Aaja Chemnitz, sapaatip-akunnerata naanerani pisut kingorna USA-mit tatineqarneq ersarinnerulersoq isumaqartoq, oqarpoq.
Donald Trumpip Kalaallit Nunaata isumannaatsuuneranut tunngatillugu oqaaseqarnermini uupakaatitsiniarsarisoq taanna oqarpoq:
Chemnitz: Trump uupakaatitsiniarsarivoq
- Kalaallit Nunaat soqutigineqartuarpoq, assersuutigalugu russit Kinamiullu umiarsuaat nunatta imartaaniittut ingasattajaarunneqartarlutik.
- Illersornissamut Ataatsimiititaliami ukiut qulit sinnerlugitilaasortaavunga, ilaannikkullu umiarsuaqartarpoq, namminerli soqutigisat siuarsarniarlugit ingasaassineq Kalaallit Nunaanni pissutsit pillugit uukapaatitsiniaanerullunilu salluneruvoq.
- Tamanna killissannik qaangiineruvoq, folketingimut ilaasortaq oqarpoq nangillunilu:
- USA-mi diplomatiimi politikkimilu malittarisassat ataqqineqanngillat. Tamanna ersarippoq.
Sakkutuut sungiusarnissaat eqqarsaatigineqartariaqartoq
Sakkutuut sivitsukkamik sungiusarneqarnissaat eqqarsaatigineqartariaqartoq Aaja Chemnitz isumaqarpoq:
- Pingaartumik upalungaarsimaneq eqqarsaatigaara, aammali Europami nunanilu avannarlerni sakkutooqarnikkut sungiusarneq Arctic Light ingerlanneqarpoq, tamannalu sivitsorneqarsinnaanersoq eqqarsaatigineqarsinnaavoq, Aaja Chemnitz oqarpoq.
