Folketingimi ilaasortat Kalaallit Nunaat Savalimmiullu videokkut isumannaatsumik ataatsimeeqatigisinnaagaat
Danmarkip, Kalaallit Nunaata Savalimmiullu akornanni videokkut ataatsimeersuartoqartillugu atortorissaarutit Nunanut allanut tunngasunut ataatsimiititaliap kaammattuineratigut maannakkut atorneqarsinnaalissapput.
Folketingip aamma Kalaallit Nunaanni Savalimmiunilu inatsisartut akornanni videokkut attaveqaatit isumannaatsuunissaat Folketingip Siulittaasoqarfiata ullumi januaarip 13-ianni ataatsimiinnermini oqaluuseraa
lars laursen
Naalagaaffeqatigiinnerup iluani videokkut ataatsimeersuarnerit maannakkut isumannaatsumik ingerlanneqarsinnaapput.
Tamanna Folketingip tusagassiutitigut nalunaarutaani allassimavoq.
Folketingip, Inatsisartut Savalimmiunilu Lagtingip akornanni videokkut attaveqaatit isumannaatsuunissaat Folketingip Siulittaasoqarfiata ullumi januaarip 13-ianni ataatsimiinnermini oqaluuseraa.
Attaviit isumannaatsut pingaaruteqartut
Tamanna Nunanut allanut tunngasutigut ataatsimiititaliami siulittaasup Christian Friis Bachip (V) Folketingimi siulittaasumut sapaatip-akunnerani kingullermi allagaqarneranut tunngassuteqarpoq. Taanna ataatsimiititaliap ajoqusersorneqarani paasissutissanik ingerlatitseqqiisarnissaanut attaveqaatit isumannaatsut qulakkeerneqarnissaat pillugu apeqquteqarpoq.
- Videokkut ataatsimiinnermi attuumassuteqanngitsunik tusarnaartoqartannginniassammat attaveqaatit isumannaatsut qulakkeerneqarnissaat ataatsimiititaliamut pingaaruteqarpoq.
- Taamaammat ataatsimiititaliaq ataatsimeeqatinik paasissutissanik paasiuminaallisakkanik tigusisinnaasunik eqqissilluni videokkut ataatsimeeqateqarsinnaaniassammat Folketingip ministerit isumannaallisaanermullu oqartussat suleqatigalugit atortunik maannakkut atuisinnaalersitsinera naammagisimaarpara, Folketingimi siulittaasoq Søren Gade oqarpoq.
USPO-p siulittaasoq naammagisimaarinnittoq
Folketingi siunissami aamma videokkut isumannaatsumik ataatsimiinnissamut namminerisaminik atortorissaaruteqalissaaq.
Folketingimi nunanut allanut tunngasunut ataatsimiititaliaq Inatsisartullu ataatsimiititaliaat marlunngormat ullaakkut ilisimatinneqarneri nunanut allanut sillimaniarnermullu ataatsimiititaliami (USPO) siulittaasup Pipaluk Lyngep (IA) naammagisimaarutigai.
- Aatsaat siullerpaamik ataatsikkut paasissutissiivigineqarpugut. Nalinginnaasumik aatsaat tusagassiuutitigut saqqummiunneqareeraangatta kingusinnerusukkut nassinneqartaraluarpugut.
- Tamanna killiliinerma kinguneraa, ataatsimiititaliami siulittaasoq oqarpoq.
