Najannguaq Hegelund (37) Folketingimut qinigassanngortittut 24-t ilagaat.
Taanna partiimit Naleqqameersuuvoq, tassanngaanniillu Karina Zeeb, Oliver Bech aamma Juno Berthelsen aamma qinigassanngortipput.
Najannguaq Hegelund (37) Folketingimut qinigassanngortittut 24-t ilagaat.
Taanna partiimit Naleqqameersuuvoq, tassanngaanniillu Karina Zeeb, Oliver Bech aamma Juno Berthelsen aamma qinigassanngortipput.
Danmarkimi kalaallit angajoqqaajusut inatsisitigut isumannaatsuunissaat Najannguaq Hegelundip pingaartitaasa ilagaat, tamannalu ukiuni kingullerni arlalinni sammilluarsimavaa.
Danmarkimi inatsisitigut isumannaatsuuneq
Najannguaq Hegelundip Danmarkimi ilinniarnermini sooq kalaallit taama amerlatigisut meeqqaminnik angerlarsimaffiup avataanut inissiisimanersut soqutigilerpaa.
FOLKETINGIMUT QINERSINISSAMI MAANNAMUUGALLARTOQ QINIGASSANNGORTITTUT
Naleraq:
Najannguaq Hegelund, Karina Zeeb, Oliver Bech, Juno Berthelsen.
IA:
Naaja H. Nathanielsen, Kuupik V. Kleist, Pipaluk Lynge, Nivi Rosing, Kalistat Lund, Aqqalukkuluk Fontain.
Atassut:
Bentiaraq Ottosen, Orla Joelsen, Malu Ostermann.
Siumut:
Ane Lone Bagger, Najaaraq Møller, Ineqi Kielsen, Aka Hansen, Doris J. Jensen, Erika Nielsen Baadh.
Demokraatit:
Anna Wangenheim, Patrick Abrahamsen, Napaartoq Petrussen, Hans Jørgen Mørch, Inuujuk Louis Petersen, Bent Olesen.
– Nakuuserneq, kinguaassiuutitigut atornerluineq imigassarluunniit aalakoornartulik pissutaasimassasoq aallaqqaammut eqqarsarpunga, misissuinerulli kinguninngua taamaattoqanngitsoq paasivara. Amerlanertigut angajoqqaanngornissamut piginnaaneqarneq apeqqutaasarpoq. Angajoqqaat kalaallit Facebook aqqutigalugu attavigisalerpakka, arlallillu Danmarkimi saaffissaqaratillu ikiorneqanngillat.
– Angerlarsimaffiup avataanut inissiisarnerup iluani misissuinera taama aallartippoq, tassani angajoqqaat kalaallit inatsisitigut isumannaatsuunerat ajorluinnartoq paasiartulerpara. Oqaloqatigiinnerni pingaarutilinni oqalutseqarnissamik neqeroorfigineqanngillat, misilitsinnermilu isummiussereertarneq misigisarpaat. Angajoqqaat amerlasuut sooq meeqqatik inissinneqarsimanersut kingorna paasisinnaaneq ajorpaat, Najannguaq Hegelund oqaluttuarpoq, naggataatigullu angajoqqaanik meeqqanillu kalaallinik inissiisarnermut tunngatillugu misigisaqarsimasunik inaarutaasumik allaaserinnippoq.
Tamatuma saniatigut peqatigiiffimmut Mentor Immanuelimut ilaasortanngorpoq, tamatumalu kingorna inatsisileritooq Tina Naamansen peqatigalugu peqatigiiffik Sila 360 pilersippaa. Peqatigiiffik Atlantikup Avannaani aningaasaateqarfimmit, Nordatlantpuljenimit, aningaasaliiffigineqarpoq, Najannguaq Hegelundilu taamaalilluni peqatigiiffimmi ulloq naallugu sulisinnaalerpoq.
Ukiuni ineriartorfiusuni Kalaallit Nunaanniittoq
Najannguaq Hegelundip Miki Hegelund uigaa, taakkulu pingasunik 16-inik, 11-nik aamma qulingiluanik ukiulinnik qitornaqarput. Maniitsumi inunngorpoq, qulingiluanilli ukioqalernissami tungaanut Danmarkimi najugaqarsimalluni. Tamatuma kingorna Kalaallit Nunaannut uterpoq, tassanilu Maniitsumi, Aasianni, Sisimiuni Nuummilu najugaqarsimalluni.
– Danmarkimi Kalaallit Nunaannilu angalasarnikuuvunga. Ukiunili ineriartorfigisanni Kalaallit Nunaanni najugaqarpunga. Tamanna kinaassutsinnut sunniuteqarpoq.
Najannguaq Hegelund Folketingimi ilaasortanngornissamut periarfissani marlunni pilerinartuni arlaanni qinigaasinnaanerminut tunngatillugu ima oqarpoq:
– Suut tamarmik ammapput. Qinigassanngortittut allat assigalugit periarfissaqarluarlunga isumaqarpunga. Qineqqusaartut akornanni nukittuunik inoqarpoq, kisianniinuit qanimut suleqatiginissaannut allannguinermullu piviusumut misilittagaqarama allaanerussutigaara, tamannalu nammineq kajumissutsimik sulininni erseqqilluinnarpoq. Aammattaaq pingaartitannik isummannilluunniik qanoq ilinikkulluunniit allanngortitaqarnikuunngilanga.
