Frankrigimi ministeriuneq angerlarsimaffimmit aneqqusaajunnaarnissap atuutilersinnissaanut piareersimavoq

Frankrigimi illoqarfiit arlallit aneqqusaajunnaarsitsinissamut ataasinngornermi unnukkut periarfissinneqarput.

BBC naapertorlugu Frankrigimi ministeriuneq Sebastien Lecornu sapaatip-akunnerata naanerani akerliussutsimik, takutitsinerit kingorna taama oqarpoq.

Nutaarsiassaqartitsivik AFP naapertorlugu illoqarfinni aalajangersimasuni killilimmillu inerteqquteqartoqartariaqartoq taanna oqarpoq.

Taamaaliornikkut suliffeqarfiit inuillu tamarmik illersorneqarnissaat siunertaasoq, Lecornu nangippoq.

Inuit hundredetusindillit aqqusinerni sapaatip-akunnerata naanerani katersuupput, aserorterisoqarneranik ujajaasoqarsimaneranillu aamma nalunaaruteqartoqarpoq.

Parisimi niuernermut ataatsimiititaliap nalunaarutigaa Parisimiinnaq pisiniarfiit 300-t aamma 400-t akornanniittut aserorterneqarsimasut. Reuters naapertorlugu Frankrigi tamakkerlugu niuertarfiit 2000-it eqqugaapput, franskit niuernermut ataatsimiititaliaat nalunaarpoq.

Marseille illoqarfiit pikitsitsinernit eqqugaanerpaasut ilagaat.

AFP naapertorlugu ataasinngornermi ullup-qaqqata unnukkullu arfineq-pingasup akornanni, tamanut katersuunnissaq inerteqqutaassasoq, illoqarfimmi oqartussaasut nalunaarput.

Sumiiffinni amerlasuuni angerlarsimaffimmit aninissamut inerteqquteqarnissaq atuutilersinneqassanersoq ingerlaannaq ataasinngornermi erseqqissarneqanngilaq. Borgmesterit sumiiffinni "pisariaqartitsiffiusuni" taamaaliornissamut periarfissaqartut, Lecornu oqarpoq.

Akerliussutsimik takutitsinerit nalaanni Frankrigimi illoqarfinni arlalinni politiit sapaatip-akunnerata naanerani aqutsisinnaajunnaarsimasut, Frankrigimi naalagaaffimmi pissutsinut ministerip Laurent Nunezip ataasinngornermi nassuerutigaa.

Frankrigi tamakkerlugu inuit 2000-init amerlanerusut tigusarineqarput, politiillu 600-t ikiligaallutik, naalagaaffimmi pissutsinut  ministeri oqarpoq.

Akerliussutsimik takutitsinerit Frankrigimi atuarfinni pissutsinut akerliunertut aallartipput.

Akerliussutsimilli takutitsinerit akerleriissutinut amerlanerusunut, soorlu inuuniarnermut aningaasartuutit qaffasippallaarnerannut inuiaqatigiillu aaqqissuussaanerannut tunngalersinneqarput, malitsigisaanillu akerliussutsimik takutitsisut inuiaqatigiit inooqataasinnaanerannik toqqissisimanissaannillu qulakkeerinninngillat.

RITZAU