Great Greenlandimi pisortanngortoqarlunilu arnaq namminersortoq siulersuisuni siulittaasunngortoq
Namminersorlutik Oqartussat suliffeqarfiutaanni maannamut pisortaagallartoq Aviaja Holm Jensen pisortanngortinneqarpoq. Pitsi Høegh siulersuisuni siulittaasunngorpoq.
Great Greenland pisortartaarpoq.
Assi: Great Greenland
Namminersorlutik Oqartussanit pigineqartumi Great Greenlandimi ukiumoortumik ataatsimeersuarnerup aqaguani pisortaq Preben Møller illuatungeriit isumaqatigiissutigineratigut soraarpoq.
Aviaja Holm Jensen pisortaanerugallartutut akisussaaffik tiguaa, maannalu decembarip aallaqqaataaniit siulersuisunit pisortatut atorfinitsinneqarpoq. KNR taama allaaserisaqarpoq.
Suliffeqarfimmi immikkut ittumik ataatsimeersuarnerani Naalakkersuisut siulersuisuni ilaasortanik arlalinnik taarsiipput.
Suliffeqarfiit nalunaarsorsimaffianni (CVR) takuneqarsinnaavoq.
Siulersuisuni ilaasortaajunnaartut tassaapput Juliane Henningsen Heilmann, Louise Grace Lynge Berthelsen aamma Niels Eli Boassen.
Namminersortoq siuttunngortoq
Pitsi Høegh siulittaasunngorpoq, Jørgen Aqe Møllerilu siulersuisunut ilaasortanngorluni.
Pitsi Høegh takornarialerinermik ingerlatsivimmi Greenland Sagalandsimi pisortaallunilu piginneqataavoq, Jørgen Aqe Møllerilu Royal Arctic Linemi siulersuisunut aamma ilaasortaalluni.
Pitsi Høegh Qaqortumi suliffeqarfimmik Greenland Sagalandsimik ukiorpassuarni ingerlatsivoq, maannalu Great Greenlandip siulersuisuini siulittaasunngorluni.
Assi: Greenland Sagalands
Great Greenland Qaqortumiittoq nuna tamakkerlugu puisit amiinik tunitsivinnik 34-nik ingerlatsivoq.
Naatsorsuutit kingulliit (2024) 1,1 millionit koruuninik amigartooruteqarput, naatsorsuutinilu ingerlatseqatigiiffik ingerlaannassappat Namminersorlutik Oqartussanit tapiissutinik amerlineqarnissaat pisariaqartoq nalunaarutigineqarpoq.
