Greenland Airports Air Greenlandilu Ilulissani mittarfissami atortunik misiliilersut

Ilulissani mittarfik nutaaq pilersaarutaasut naapertorlugit sapaatit akunnerisa tulliani, sisamanngornikkut, oktobarip 29-ani atulerluni ammassaaq. 

Mittarfik nutaaq, mittarfiup illutaa nutaaq atortorissaarutillu nutaat aamma ulloq taanna atulissapput. Atortut nassatanik tunniussinermit isumannaallisaanermut tunngasut pingasunngornermi oktobarip 21-ani misilittarneqassasut, Ilulissani mittarfissami isumannaallisaanermut pisortaq Sermitsiamut oqaluttuarpoq.

- Airgreenland sulisugullu (Greenland Airportsimi, aaqq.) peqatigalugit pingasunngorpat misiliissaagut. Tassani isumannaallisaanermi atortugut misilissavagut. Tassani pineqarput nassatanik tunniussineq, nunanullu allanut angalasussanik misissuineq eqqortumik suliarineqarnersut pillugit misiliineq, Lars Daner Lindholm oqarpoq.

Misiliinermi "nunanut allanut aallariartortuusaartut" mittarfissap illutaanukassapput. Tassani nassataat tunniunneqassapput, nassatanik ingerlatitsivikkoorunneqassapput, misissuutillu atorlugit misissorneqarlutik. Taama pisoqareerpat Air Greenlandip nassatanik assartuisartui timmisartumik usilersuisartuutigisut nassatanik isumaginnissapput. 

- Aallariartortuusaarlutik peqataasussat 20-t missaannik amerlatigisut peqataanissaat naatsorsuutigaarput, taakkua nassataminnik tallimariarlutik tunniussissapput, tamanna nassatanik 100-nik naleqarpoq. Tassani nassatanut misissuutigut pissusissamisut innersut misilissavagut. Nassatat ingerlaarfissaat ajunnginnersoq misilissavarput, Lars Daner Lindholm oqarpoq.

Airgreenlandip sulisui soorlu oqimaalutaavimmi taavalu aamma timmisartumi usilersuisartut misiliinermi peqataanerisa saniatigut Greenland Airportsimi isumannaallisaanermi kiisalu nassatat inuillu pillugit sulisut allat peqataassasut, isumannaallisaanermi pisortaq oqarpoq.

Sulineq arreeqqaarsinnaassasoq

Nassatat taakkualu ingerlaarnerannut tunngasut ullaap tungaani misilittarneqassapput. Ulloqeqqasioqatigiittoqareerpat inuit angalasussat taakkualu tigummiarlugit nassataat ualineranut misiligarneqassapput.

- Ualikkut inuit taama amerlatigisut tigummiaannarlugit nassataat inuillu aamma misileraatigalugit misissorneqassapput. Tassani suut nassaqqusaanersut nassaqqusaannginnersulluunniit paasiniarneqartussaapput.

- Misiliinermi tassani takuniarparput ajunngitsumik iliornerluta imaluunniit arlaatigut allannguilaartariaqassanerluta, Lars Daner Lindholm oqarpoq.

Misileraalluni suliaqarnermi sukkassuseq aamma uuttorusuppaat. Sulialli aallartinneranni sukkanerpaasinnaannginneq, Sermitsiap mittarfissamut pulaarnerani nassuerutaavoq. 

- Suleriaasissagut sulisullu taama iliornikkut misilittassavagut. Suleqatigiit nutaajuvugut. Mittarfik nutaajuvoq. Suleriutsit isumannaallisaanermullu pilersaarut nutaajupput. Suut tamarmik nutaajusorujussuupput, ajornanngitsuinnaanngilaq. Suut tamarmik ingerlaqatigiissinnaasariaqarput, isumannaallisaanermi pisortaq oqarpoq.

Ilulissani mittarfissami isumannaallisaanermik suliaqartut 15-pput. Aallartisarnermili Danmarkimi Billundip mittarfianit ikiorneqarput.

Isumannaallisaanermik suliaqartoq ernumanngitsoq

Pingasunngornermi misiliisoqarnerani atortut tamarmik misilinneqassapput. Tamannalu naammassilluassallugu naatsorsuutigigini isumannaallisaanermut suliaqartoq Marius Lyberth Larsen Sermitsiamut oqarpoq.

- Suleqatigiilluta ingerlalluarnissarput ilimagalugulu naatsorsuutigaara. Pissutigalugu suleriutsinik nutaanik maanna utikaajaarivugut. Ajunngitsussaq pitsaasoq pillugu utikaajaarivugut, taanna oqarpoq.

Marius Lyberth Larsen isumannaallisaanermik suliaqarnermi misilittagaqarluartunut akuuvoq. Kangerlussuarmi Nuummilu sulianik taamaattunik siornatigut aamma suliaqartareerpoq. Suleqatiminullu maanna naatsorsuutai pitsaasuupput: 

- Misilittagallit arlaqarpugut. Kisianni aamma nutaartagut ilikkajasuupput. Taamaattumik misiliinissatsinnut isumalluarpunga, taanna oqarpoq.

Sermitsiap Ilulissani mittarfissami isumannaallisaanermut akuersissutit suut akuerineqareernersut, suullu suli akuerineqannginnersut, ilaatigut pillugit Greenland Airportsimut apeqqutigai. Allaaserisap suliarineqarnerani tassanngaanniit akissuteqartoqanngilaq.