Greenland Airports-ip Nuummi timmisartuussinermi aqutsineq atuutsilersissavaa
Sivisuumik pilersaarusiorneqareerluni maanna nalunaarutigineqarpoq: aaqqiissutissaq nutaaq, tassalu timmisartuussinermi aqutsineq avitsilluni agguataagaq, Nuummi mittarfiup angallannermut aqutsisoqarfimmiit killilersugaaneranik atorunnaarsitsisussaq atuutsinneqartussanngorpoq, neriuutigineqarporlu 2026-mi angallannerpaaffik nallertinnagu angumerineqassasoq.
Angallannermut aqutsisoqarfimmit aalajangerneqarnikuuvoq, nalunaaquttap akunneranut timmisartut marluinnaat Nuummut missinnaasut. Tamanna allanngortinneqarsinnaanngussaaq timmisartuussinermi aqutsineq nutaaq atuutilersinneqarpat.
Assiliisoq: Oscar Scott Carl
Nuummi timmisartuussinermut aqutsineq kingullertigut Greenland Airportsimi oqaluuserisassani pingaarnerpaajusimavoq, maannakkullu apeqqut pillugu aalajangiisoqarsimavoq, tallimanngornermi ualikkut nalunaarutigineqarpoq.
Nuummi mittarfiup aaqqiissutissamik timmisartuussinermut aqutsineq avinneqarsimasoq, Norgemi timmisartuussinermut ilisimaneqarluartoq TMA-modelimik taaneqartoq, aaqqiissutigissavaa. Tassa imaappoq, timmisartuussinermut aqutsisut qutsissuseq aalajangersimasoq tikillugu aqussisassapput. Tamatuma kingorna timmisartuussinermi aqutsinertaqanngitsumik silaannarmiinneq apuunnissap tungaanut pisasssalluni.
- Maannakkut aaqqiissutissaq angallannermi killilersuinernik
kivitsisinnaasoq aammalu Nuummi silaannakkut angallannermut
siunissamut qulakkeernissaanut naammassilluinnalermat
naammagisimaartorujussuuarput. TMA-modelip angallannerup
annertusiartortup iliuuseqarfiginissaanut pisariaqartunik
pisinnaasaqartilissavaatigut isumannaatsuutissallutalu, aammalu
sapaatit akunnerini aggersuni isumaqatigiissutip inissitsinnissaa
qilanaaraarput, tassanilu annertunerusunik nalunaaruteqassaagut, Greenland Airportsimi pisortaq, Jens Lauridsen oqarpoq.
Periuseq pillugu toqqaanermi Air Greenlandimik aamma Angallannermut Aqutsisoqarfimmik oqaloqateqarnikkut pisimavoq, naalagaaffiullu pigisaata Naviairip timmisartuussinermut aqutsinermik pilersitsisussatut ingerlatsisussatullu toqqarneqarsimavoq, Greenland Airports paasissutissiivoq.
Tamatumunnga tunuliaqutaavoq, angallannermut aqutsisoqarfiup ukiap ingerlanerani Nuummi timmisartuussineq pillugu nutaanik killilersuuteqartitsilersimanera, Air Greenlandip nunatta iluani pilersaarutaanut unammillernartorsiortitsilluinnartoq. Neriuutigineqarpoq, killilersuutit taakku peerneqarsinnaalissasut, timmisartuussinermut aqutsineq pilersinneqareerpat.
Anguniagaq tassaavoq isumaqatigiissut juullertinnagu naammassineqassasoq. Angallannermi aqutsineq pilersaarutit malillugit aallartissaaq aasartinnagu, Greenland Airports allappoq.
