Greenland Airportsip naatsorsuutini 130 millionit inissisimanerat nassuiaatigerusunngilaa

Qanittukkut Sermitsiami allaaserineqarpoq Greenland Airports 2025-mut naatsorsuutaani marlunnik kukkussuneqartoq millioninik pingasunik kisitsisitalinnik. Kukkussutaasut ilaat pissutigalugu suliffeqarfissuup ingerlatsinermut aningaasartuutaat piviusumit 364 millioner koruuninik amerlanerusutut isikkoqalersippaat.

Sermitsiap misissuinini annertusillugu 2024-mut naatsorsuutit aamma misissorpai, ingerlatsinermi aningaasat nikerarneri, tassa cashflowit, suliffeqarfissuarmit isertut anisullu kukkuneqarnersut misissorniarlugu.

Atuaruk aamma

Imminut eqqarsaatigeqqissaarnissamut piffissaq: Hundred millionilikkuutaanik naatsorsuutitigut kukkuneq Grønlands Revisionip takunngitsoorpaa

Taarsersugassanik allanngortiterinermi aningaasat nalittorneratigut iluanaarutit 130 millionit koruunit 2024-mi suliffeqarfissuup ingerlatsinermi aningaasat nikerarnerisa naatsorsorneqarneranni ilanngunneqarsimasut, misissuinerup takutippaa. Iluanaarutit ingerlatsinermeersutut sooq naatsorsuutini allanneqarsimanersut Sermitsiamit apeqqutigaarput.

Greenland Airportsip apeqqutit siuliani apeqqutigineqartunut sanilliullugit allaanerulluinnartumik isummerfigai, kingullernammimmi nammineq oqarnerattut nassueruteqarput.

Tamatumuuna aningaasat eqqortumik inissinneqarsimaneranut apeqqummut angerusuganilu naaggaarusunngilaq.

Tunngavilersuutissaqanngitsoq

Greenland Airportsip kukkunersiuisui, Per Jansen aamma Anders Lau Nielsen Grønlands Revisionimeersut (ukioq manna siusinnerusukkut Grant Thornton Danmarkimut ilaalersut) Sermitsiamit attaveqarfigaagut.

Kukkunersiuisut oqaaseqaataat kingorna Greenland Airportsimi aningaasaqarnermut pisortap Per Stjærnholm Trærupip akuerisai, imaapput:

-Aningaasat ingerlaarnerannik 2024-mut naalunaarsuinerit isunatusaartumik ingerlanneqarsimaneranik naliliinerput attatiinnarparput.

Atuaruk aamma

Allamik annertoorujussuarmik kukkuneqarneq: Greenland Airportsip ingerlatsinerup aningaasatigut karsimut ilanngussaa 364 millioninik amerlanerpaamik naatsorsorpaa

-Inatsisitigut naatsorsueqqissaarnermilu najoqqutassiani aalajangersakkat iluanni aningaasat ingerlaarneri qanoq immikkoortiterneqassanersut suliaqartunit soorunami assigiinngitsunik isumaqarfigineqarsinnaavoq.

-Taamaattoqarneratali ukiumoortumik nalunaarusiap ataatsimut isigalugu tulluartumik saqqummiussineranik naliliisimanerput allanngortinngilaa.

Sermitsiap apeqqutigeqqippaa 130 millionit eqqortumik ("isumatusaanerinnarmiunngitsoq") inissinneqarsimanersut.

Taarsersugassanik allanngortitserinermit iluanaarutit ingerlatsinerup ataanut inissinneqarsimaneranut aningaasaqarnermik suliaqartutut tigussaasunik tunngavilersuutinik Sermitiamit ujartuivugut.

Allanik ilassutissaqanngilaq 

Taamaattorli Greenland Airportsimiit imaluunniit Grønlands Revisionimit nassuiarneqanngilaq naatsorsueqqissaarnermut malittarisassani assigisaanilluunniit sumi taamatut periarfissaqarnersoq:

– Maanngaanniit nalunaarutigissavarput kukkunersiuisut akissutaasa tigoreersimasavit saniatigut allamik oqaasissaqannginnatta, Greenland Airportsimi attaveqaqatigiinnermut pisortaq Stine Buur Hvistendahl allappoq.

130 millionit kukkusumik inissinneqarpata, 2025-mi pisut kingunerisaasa assinganik kinguneqassaaq. Ingerlatsinermi aningaasat nikerarnerat amigartoorfiusoq naatsorsuutinik atuartumut sinneqartoornertut saqqummiunneqarluni. Aningaasat nikerarneratigut iluanaarutit peerneqarpata, plussit 87 millioniusut plus 43 minusinngussapput. Naqqiisoqartariaqarnersoq paasiniarlugu Sermitsiaq immikkut ilisimasalimmik maanna naliliisitsiniarsarivoq.

Ingerlatsinermi aningaasat nikerarnerisa sinneqartooruteqarfiunerat imaluunnit amigartooruteqarfiunerat suliffieqarfiup sinneqartoorutaanut imaluunniit amigartoorutaanut paarlaanneqassanngilaq.

Aningaasat nikerarneranik naatsorsuutini siunertarineqarpoq, suliffeqarfissuup karsianit ikineqarsimasut peerneqarsimasullu ukununnga agguataarneqarnerit takutissallugit: ingerlatsinermut, aningaasaliissutigineqartunut aamma aningaasalersorneqartunut.