Greenland Airportsip pisortaanissaa nutaaq toqqarneqartoq

Greenland Airportsimi pisortaaninngortussaq KNI-mi maanna pisortaanerusoq nalunaarutigineqarpoq. Taanna tassaavoq Jeppe Jensen, 2026-milu novembarip aallaqqaataa aallarnerfigalugu atorfinittussaassalluni.

Jeppe Jensenip Greenland Airportsip Kalaallit Nunaannut pingaaruteqartorujussuunera pissutigalugu atorfimmut akuersisimalluni oqarpoq.

AAMMA ATUARUK

Mittarfeqarfimmi pisortaaneq atoqqaarfissiornerup kingorna soraassasoq

- Suliffeqarnera tamaat suliffeqarfinni inuiaqatigiinnut kalaallinut suliassanik pingaarutilinnik suliaqartuni sulinissaq kajumigisimavara. Tamanna aamma Greenland Airports-imut atuuppoq. Silaannakkut angallanneq inuiat naapissinnaanissaannut, suliffeqarfiit ineriartornissaannut aammalu nunatta ataqatigiissinnaassuseqarnerata qulakkeernissaanut pisariaqarpoq. Suliassap taassuma sulisut suleqatigisartakkallu peqatigalugit suliarinissaanut qilanaartorujussuuvunga, Jeppe Jensen oqarpoq. 

- Ilulissani inunngorpunga peroriartorlungalu, taamaattumik nunanit tamalaanit mittarfittaassap tassani ammarneranut peqataanissaq soorunami immikkuullarilluinnartussaavoq. Kisianni siullermik pingaarnertullu illoqarfimmut aammalu Kalaallit Nunaat tamakkerlugu ulloq pingaaruteqartorujussuusussaavoq. Mittarfiit nutaat aammalu pioreersut siunissami ukiorpassuarni Kalaallit Nunaat tamakkerlugu iluaqutaanissaannut qulakkeereqataanissara qilanaaraara. 

Jeppe Jensen cand.merc.-itut ilinniagaqarpoq, KNI-mi 2021-mi pisortaaninngorpoq siornatigullu Mittarfeqarfinni Tusassimilu qullersatut atorfeqarnikuulluni.

Siulersuisuni siulittaasup Jens Wittrup-Willumsenip pisortaaninngortussaq qilanaaralugu oqaatigaa:

- Jeppe attaveqaasersuutinik inuiaqatigiinni pisariaqartinneqartunik aammalu aaqqissuussaanerni annertuuni aqutsinermik annertoorujussuarmik misilittagaqarpoq. Peqatigisaanik annertuumik niuernermik paasisimasaqarpoq, atorluarusutatsinnik. Naatsumik oqaatigalugu ilisarnaatai Greenland Airports-ip suliffeqarfittut inuiaqatigiinni pisariaqartinneqartutut, Kalaallit Nunaat tamakkerlugu periarfissanik suli amerlanerusunik ammaassisussatut, ineriartortinnerani immikkoortup tullianut tulluaqqissaarput, Jens Willumsen Greenland Airportsip tusagassiuutitigut nalunaarutaani oqarpoq.

Jens Wittrup-Willumsenip maanna pisortaaneq Jens Lauridsen, suliniuteqarluarsimanera pillugu aamma qujaffigaa.

Jens Lauridsen Ilulissani mittarfik nutaaq oktobarimi ammarneqareerpat atorfimminiit tunuarniarluni ukioq manna siusinnerusukkut nalunaarutiginikuuaa.